Երեկ «Հայաստան-տեղեկատվություն» կենտրոնում տեղի ունեցած ասուլիսը նվիրված էր սեպտեմբերի 20¬22-ը Հայաստանում անցկացվելիք անդրանիկ ամենամյա «Կենաց» փառատոնին։ Բացումը տեղի կունենա այսօրՙ Երեւանում։ Փառատոնի նպատակը Հայաստանի մշակութային, պատմական, տնտեսական հարստությունները աշխարհին ներկայացնելն է։
«Կենաց» փառատոնը, որ զբոսաշրջությանը նպաստող հանգամանք կլինիՙ կհամախմբի մեր երկիր ժամանած հյուրերին եւ տեղացիներին, քանի որ Հայաստանը հյուրընկալ դառնալու եւ զբոսաշրջիկներին գրավելու շատ պոտենցիալ ունիՙ իր պատմամշակութային արժեքներով, ազգային կոլորիտով, կենցաղով, արվեստով, հողի բերք ու բարիքով։
Փառատոնի ծրագիրը ներկայացրեց «Հովնանյան-ինտերնեյշնլ» կազմակերպության ներկայացուցիչ Նինա Հովնանյանը։
Փառատոնի միջոցառումները կսկսվեն սեպտեմբերի 20-ինՙ «Խորհրդարանը ժողովրդի համար» համերգովՙ ՀՀ Ազգային ժողովի շենքի բակում։
Սեպտեմբերի 21-ին, ժամը 18։30-ին Հանրապետության հրապարակից կազմակերպված հանդիսավոր երթը նվիրված կլինի Անկախության օրվան, որին կհաջորդի ներկայացումը։ Իսկ ավարտինՙ ժամը 22։00-ին, կլինի հրավառություն։
Սեպտեմբերի 22-ին Հանրապետության հրապարակում, ժամը 11։00-ին կսկսվի մեծ տոնակատարությունՙ երգեր, պարեր, ուրախների եւ հնարամիտների ակումբի ներկայացում, բաժակաճառերի մրցույթ, աճուրդ։ Ժամը 22։00-ինՙ փակման արարողություն եւ դիսկոտեկ մինչեւ կեսգիշեր։
Իսկ մինչեւ սեպտեմբերի վերջերը տեղի կունենան մշակութային եւ այլ բնույթի բազմաթիվ միջոցառումներ։
Մ. Բ.