Երեկ սպիտակցի եւս 60 ընտանիք բնակարանամուտ տոնեց։ Կենտրոն-1 թաղամասում նորակառույց 5 շենք հանձնվեց շահագործման։ Թաղամասի թիվ 2, 4, 17, 22, 23 բնակելիների հանձնման հանդիսավոր արարողությանը ներկա բնակարան ստացող ընտանիքներին, սպիտակցիներին, հյուրերին ողջույնի խոսքով դիմեց Լոռու մարզպետ Հենրիկ Քոչինյանը։
«Կանակա», «Մ. Սիսակյան», «Մ. Լամբարյան» շինկազմակերպությունները բարեխղճորեն են կատարել իրենց գործը, շահագործման հանձնված բնակարանները համապատասխանում են պահանջվող չափանիշներին։
Այնուհետեւ այցելեցին Սպիտակ-Գյումրի ավտոճանապարհի թունել։ Շուրջ 900 մետր երկարությամբ թունելի շինարարությունն անավարտ էր մնացել ֆինանսավորման դանդաղեցման պատճառով։ Այս տարվա սեպտեմբերից «Լինսի» հիմնադրամի ֆինանսավորմամբ «Հայթունել» ԲԲԸ-ն ձեռնամուխ եղավ թունելի վերակառուցման աշխատանքներին։ Հարակից տարածքների հետ մեկտեղ 1200 մ երկարությամբ թունելի շահագործումը, որը նախատեսված է 2003 թ. սեպտեմբերին, բավականին կդյուրացնի ճանապարհը։
ՄԱՆՎԵԼ ՄԻԿՈՅԱՆ