Աշխարհահռչակ երգիչ Շառլ Ազնավուրի «Ազնավուրը Ազնավուրի մասին» գիրքը, որ լույս տեսավ Խորհրդային Հայաստանում, մինչ օրս ընթերցվում է մեծ հետաքրքրությամբ, քանզի պատմում է նրա կյանքի դժվարությունների ու մեծագույն հաջողությունների մասին։ Դրանից հետո Ազնավուրը երկար ժամանակ մերժում էր իր կյանքի մասին նոր գիրք գրելու երկրպագուների առաջարկը, սակայն երկու տարի առաջ նրա մեջ հասունացավ տարիների հույզերը, ապրումներն ու հուշերը թղթին հանձնելու ցանկությունը։ Ազնավուրի նոր գիրքըՙ «Առաջադիմելու ժամանակը», օրերս հրատարակել է ֆրանսիական «Ֆլամարիոն» հրատարակչությունը։ Գիրքն ինքնակենսագրական բնույթ ունի, ընդգրկում է Ազնավուրի կյանքի կարեւորագույն դրվագները։ Մեծ երգիչը, չնայած իր բազմազբաղվածությանը, ժամանակ է գտել նոր գրքի վրա աշխատելու, որն ավարտին է հասցրել երկու տարվա ընթացքում։
Ռ. Պ.