Մայր աթոռ Սբ. Էջմիածնի մամլո դիվանից տեղեկացանք հունիսի 24-ին տեղի ունեցած Գերագույն հոգեւոր խորհրդի եւ Հայաստանի եպիսկոպոսների ու թեմակալ առաջնորդների միացյալ ժողովի մասին, որտեղ քննարկվել են նաեւ Հայաստանում ներդրվող սոցիալական քարտերի համակարգի հետ կապված որոշ հարցեր:
Ներկայացնենք Մայր աթոռ Սբ. Էջմիածնի արձանագրած դիրքորոշումը. «Սուրբգրային հայտնությամբ եւ եկեղեցու ուղղափառ հայրերի սրբազան ուսուցումների լույսի ներքո բացառելի է սոցիալական քարտի համարի որեւէ առնչում «Նեռի դրոշմին»: Հայաստանի Հանրապետությունում ներդրվող սոցիալական ապահովության քարտերի համակարգը վտանգ չի պարունակում անձի հոգու փրկության առումով, քանզի Աստված եւ մարդ հարաբերությունները հոգեւոր աննյութական աղերս են: «Հոգի է Աստված եւ Նրան երկրպագողները պետք է հոգով եւ ճշմարտությամբ երկրպագեն» (Հովհ. 4:24): Սբ. Էջմիածնի միջնորդությամբ, ինչպես նշված է հաղորդագրության մեջ, ՀՀ կառավարության համապատասխան որոշմամբ բացառվել է «6» թվի երեք անգամ հաջորդական կրկնությունը սոցապքարտերի համարներում եւ գծիկավոր պայմանանշաններում, հակառակ պարագայում առաջանում է քրեական պատասխանատվության խնդիր:
Մ. Բ.