«ԱԶԳ» ՕՐԱԹԵՐԹ

ՀԱՎԱՍԱՐՎԵՑԻՆՔ ԹԱԻԹԻԻՆ

ՖԻՖԱ-ի դասակարգման աղյուսակում շարունակվում է Հայաստանի ազգային հավաքականի նահանջը: Սեպտեմբերին ֆիններին պարտվելուց հետո մեր ընտրանին ՖԻՖԱ-ի դասակարգման նոր աղյուսակում եւս 4 հորիզոնականով նահանջեց եւ այժմ զբաղեցնում է 123-րդ տեղըՙ գտնվելով Թաիթիի, Սողոմոնյան կղզիների եւ Մոզամբիկի հավաքականների հարեւանությամբ: Իրոք որ վիճակն անմխիթար է: Եվ եթե Աստված մի արասցե, մեր ֆուտբոլիստները պարտվեն ֆիններին ու չեխերին առաջիկա ընտրական մրցախաղերում, ապա դասակարգման հաջորդ ցուցակում էլ ավելի ցածր տեղ կզբաղեցնեն: Իսկ ահա մեր անմիջական հարեւաններըՙ Վրաստանի եւ Ադրբեջանի հավաքականներն աղյուսակում վեր են բարձրացել: Վրացիները 7 հորիզոնականով առաջընթաց են ապրելՙ զբաղեցնելով 105-րդ տեղը, իսկ Ադրբեջանի հավաքականը 2 տեղով է վեր բարձրացել:

Ընտրական մրցաշարում Հայաստանի հավաքականի առաջիկա մրցակիցներից չեխերը մեկ հորիզոնականով նահանջել ենՙ լավագույն հնգյակում իրենց տեղը զիջելով հոլանդացիներին: Իսկ ահա Ֆինլանդիայի հավաքականը 53-րդ տեղից տեղափոխվել է 45-րդ հորիզոնական: Ռումինիայի ընտրանին էլ 6 աստիճանով է վեր բարձրացել եւ այժմ 26-րդ տեղում է: Մակեդոնացիները նահանջել են 4 հորիզոնականով (92-րդ տեղ), իսկ Անդորրայի ընտրանին նահանջել է մեկ տեղով (148-րդ տեղ): Սեպտեմբերի համեմատ ամենամեծ առաջընթացն ունեցել է Սլովակիայի հավաքականը (14 տեղով): 13 հորիզոնականով վեր են բարձրացել Իսրայելի եւ Կոտ դ՛Իվուարի ֆուտբոլիստները: Իսկ ահա Չիլիի հավաքականը 13 տեղով նահանջել է: Բոսնիայի ֆուտբոլիստները 12 հորիզոնականով են նահանջել:

Որոշակի փոփոխություններ են կատարվել լավագույն տասնյակում: Արգենտինացիներն իսպանացիներին դուրս մղեցին լավագույն եռյակից: Իսկ պորտուգալացիներն ԱՄՆ-ի հավաքականին փոխարինեցին լավագույն տասնյակում: Ներկայացնում ենք լավագույն տասնյակի եւ նախկին ԽՍՀՄ հանրապետությունների հավաքականների ցուցանիշները:

ԱՇՈՏ ՀԱՅՐԱՊԵՏՅԱՆ