Հայ մամուլի օրվա կապակցությամբ «Ոսկե գրիչ» մրցանակակիրների ակումբը «Ազդարար» մրցանակի է արժանացրել «Արմենակոբ» հեռուստաընկերության խմբագիր Օֆելյա Ասատրյանին, «Իմպուլս» ռադիոընկերության տնօրեն Կորյուն Խումարյանին, «Ֆոտոլուր» գործակալության գլխավոր խմբագիր Հերբերտ Բաղդասարյանին, «Կումայրի» թերթի տնօրեն Լենա Ղուկասյանին (Գյումրի), «Ազգ» օրաթերթի գլխավոր խմբագիր Հակոբ Ավետիքյանին: Մրցանակները հանձնեցին «Ոսկե գրիչի» մրցանակակիրները: «Մասնագիտական հավատարմությունը մշակութային թեմային» մրցանակը տրվեց «Գոլոս Արմենիի» թերթի մեկնաբան Նատալյա Գոմցյանին, իսկ «Ժուռնալիստական վարպետություն» մրցանակըՙ «Նովոյե վրեմյա» թերթի խմբագրի տեղակալ Կարեն Միքայելյանին:
Մրցանակների հանձնումը տեղի ունեցավ երեկ, «Աստաֆյան» ռեստորանային համալիրում, որտեղ հավաքվել էին մամուլի մեծ թվով աշխատողներ, պետական պաշտոնյաներ, հյուրեր: Ներկա էին նաեւ «Համաշխարհային հայկական կոնգրեսի եւ Ռուսաստանի հայերի միության օրերը Հայաստանում եւ սփյուռքում» ծրագրով Հայաստան ժամանած մի խումբ ռուս լրագրողներՙ «Մոսկովսկի կոմսոմոլեց» թերթի մեկնաբան Ալեքսանդր Մինկինը, «Լիտերատուրնայա գազետայի» գլխավոր խմբագրի առաջին տեղակալ Լեոնիդ Կոլպոկովը, «Նեզավիսիմայա գազետայի» գլխավոր խմբագրի առաջին տեղակալ Արկադի Խանկեւիչը եւ ուրիշներ: Ռուսաստանի լրագրողների միության կողմից քարտուղար Աշոտ Ջազոյանը Աստղիկ Գեւորգյանին հանձնեց ռուսական մամուլի 300-ամյակի շքանշանը: Այնուհետեւ ռուս լրագրողները հայաստանյան տարբեր լրատվամիջոցների թղթակիցներին հանձնեցին լրագրողների միության միջազգային ընկերակցության շնորհած դիպլոմներըՙ հայ լրագրության ոլորտում ունեցած ներդրումի համար: Դրանց թվում են Տիգրանուհի Թութունջյանը, Ռուզան Մինասյանը, Կլարա Թերզյանը, Մարգարիտա Հովհաննիսյանը, Մարկ Պետրոսյանը, Սեդա Թորոսյանը Պարխատ Ակուջանյանը: Դիպլոմների հետ նրանց հանձնվեցին նաեւ ռուսական զանգակներ, որ լրագրողների ձայնն ազատ հնչի Հայաստանում:
Երեւանի ժուռնալիստների միության նախագահ Աստղիկ Գեւորգյանը հայտնեց, որ հայ մամուլի օրվա առթիվ հոկտեմբերի 16-ին Երեւանի պետական համալսարանի Չարենցի անվան սրահում տեղի կունենա գիտաժողով նվիրված «Ազդարար» պարբերականի 210-ամյակին, որի ավարտից հետո մամուլի շենքի առջեւ կբացվի հայկական առաջին պարբերականի խմբագիր Հարություն քահանա Շմավոնյանի հուշարձանը:
«Ազդարար» մրցանակի շնորհումն իրականացնելիս Երեւանի ժուռնալիստների միության նախագահ Աստղիկ Գեւորգյանին աջակցել են Ազգային ժողովի նախագահ Արթուր Բաղդասարյանը, ԱԺ կրթության, գիտության եւ մշակույթի հանձնաժողովի նախագահ Հրանուշ Հակոբյանը, որոնց նա շնորհակալական խոսքեր հղեց:
ՌՈՒԶԱՆ ՊՈՂՈՍՅԱՆ