Ինչը վկայում է ոլորտի կայուն զարգացման մասին
Շուրջ 30 ընկերություններ էին մասնակցում երեկ կառավարության շենքում բացված տեղեկատվական տեխնոլոգիաների եւ համակարգիչների «Ինֆոտեկ» չորրորդ մասնագիտացված ցուցահանդեսին: Այն կազմակերպել էր «Էքսպո մեդիա» կենտրոնը պետական գերատեսչությունների եւ մասնավոր կառույցներին միավորող կազմակերպությունների աջակցությամբ: Ցուցահանդեսի նպատակներն էին տեղեկատվական տեխնոլոգիաների շուկայի վերլուծությունը, համակարգչային տեխնոլոգիաների նոր մշակումներին եւ գործնական կիրառման հնարավորություններին ծանոթանալը, բիզնես տեղեկատվության փոխանակումը, նոր գործընկերային կապերի հաստատումը եւ այլն: Ներկայացված տաղավարներից արժեր առանձնացնել «Յունիկոմպ» ընկերության նոր նոտ-բուկերը, «Բիտկոմպ» ընկերության «Գյուրզա» էլեկտրաշոկերը, համակարգչային տեխնիկայի ներմուծմամբ զբաղվող ընկերությունների նոր տեսականին, ծրագրային, դիզայներական արտադրանքը եւ այլն:
«Ինֆոտեկը» բացեց առեւտրի եւ տնտեսական զարգացման փոխնախարար Տիգրան Դավթյանը: Նա կարեւորելով արդեն չորրորդ անգամ մասնագիտացված ցուցահանդեսի բացումը, նշեց, որ դա վկայում է այս ոլորտի կայուն զարգացման մասին: Այդ զարգացումն արտահայտվում է արտադրողականության եւ արտահանման ծավալների աճով, որը հասնում է տասնյակ միլիոնավոր դոլարների: Փոխնախարարը կարեւորեց նաեւ նոր ընկերությունների ստեղծման եւ միջազգային ընկերությունների Հայաստան մուտք գործելու իրողությունները: Որպես օրինակ հիշատակվեց «Սինոպսիս» ընկերության գործունեության սկիզբը Հայաստանում:
ԱՐԱ ՄԱՐՏԻՐՈՍՅԱՆ