Հունվարի 25-ին Նովոռոսիյսկում պաշտոնապես բացվեց ՌԴ հարավային դաշնային օկրուգում Թուրքիայի գլխավոր հյուպատոսություն: Ավելի վաղ այստեղ գործում էր ժամանակավոր առեւտրական ներկայացուցչություն:
Գլխավոր հյուպատոսության բացման առթիվ կտրուկ բացասական վերաբերմունք դրսեւորեց Կրասնոդարի քրդական համայնքի առաջնորդ Իշխան Անկոսին: Նրա խոսքերով, Թուրքիան եղել եւ մնում է քրդերի թշնամին: Անկոսին կարծում է, որ գլխավոր հյուպատոսությունը Ռուսաստանում որպես քող կծառայի թուրքական հատուկ ծառայությունների համար:
Մինչդեռ Ռուսաստանի հայերի միության Կրասնոդարի երկրամասային բաժանմունքի նախագահ Նաիրի Հովհաննիսյանը Թուրքիայի արտաքին քաղաքական գերատեսչության բացումը համարում է բնականոն երեւույթ, որը պայմանավորված է տնտեսական նկատառումներով (գազամուղ եւ այլն), Ռուսաստանի եւ Թուրքիայի ապրանքաշրջանառության մեծ ծավալով:
Միեւնույն ժամանակ չպետք է մոռանալ Ռուսաստանի համար Նովոռոսիյսկի ռազմավարական կարեւորությունը: Անվտանգության դաշնային ծառայությունները տվյալ տարածաշրջանում քանիցս բացահայտել եւ կասեցրել են Թուրքիայի հատուկ ծառայությունների գործակալների քայլերը, որոնք իրենց հիմնական «աշխատանքը» քողարկում են առեւտրական, կրոնական եւ հասարակական զանազան կազմակերպությունների եւ ներկայացուցչությունների գործունեությամբ:
ՎԻԿՏՈՐ ՍՏԵՓԱՆՅԱՆ, Կրասնոդար