Վրաստանի գլխավոր դատախազ Զուրաբ Ադեիշվիլին այսուհետեւ ավելի կոշտ վերաբերմունք կդրսեւորի Վրաստանում հայկական պատմական հուշարձանները ոչնչացնողների նկատմամբ: Գլխավոր դատախազ Աղվան Հովսեփյանի հրավերով նրա գլխավորած պատվիրակությունը ժամանել է Հայաստանՙ առաջին անգամ դեմ առ դեմ քննարկելու տարածաշրջանում առկա հանցավոր երեւույթները: Պատվիրակության կազմում են գլխավոր դատախազի տեղակալ Կախա Կոբարիձեն եւ Վրաստանի խորհրդարանի պատգամավոր Հենզել Միկոյանը:
Գլխավոր դատախազության սրահում երեկ տեղի ունեցավ 2 հանրապետությունների գլխավոր դատախազների ասուլիսը, նրանք համառոտ ներկայացրին համատեղ ծրագրերն ու անելիքները: Աղվան Հովսեփյանը հայտնեց, որ վերջին 5 ամիսների Հայաստանի իրավապահները Վրաստանից ստացել են 30 քննչական հանձնարարություն, ուղարկել 7-ը: Վերջին շրջանում մեծացել է Վրաստանից բերված գողացած մեքենաների վաճառքը, որով հիմնականում զբաղվում են Հարավային Օսիայի բնակիչները: Վրաստանի գլխավոր դատախազը խոսեց կոռուպցիայի դեմ պայքարելու վրացական փորձի մասին, իբրեւ օրինակ նշելով նախարարներին պաշտոնանկ անելու, դատավորներին ձերբակալելու եւ այլ փաստերը: Գլխավոր դատախազները վստահեցրին, որ նոր սկզբնավորվող համագործակցությունը հնարավորություն կտա ստեղծելու այնպիսի մեխանիզմներ, որոնք թույլ կտան ապագայում կրճատել հանցագործությունների թիվը:
Ավելի ուշ Զուրաբ Ադեիշվիլուն Մայր աթոռ Սբ. Էջմիածնում ընդունեց Ամենայն հայոց հայրապետը:
Ռ. Պ.