Ֆուտբոլի եվրոպական գավաթների խաղարկության մեկնարկին քիչ ժամանակ է մնացել: Այժմ ֆուտբոլասերներին առավել հետաքրքրում են եվրոգավաթների մասնակից մեր թիմերի մրցախաղերը: Այս առումով մեծ հետաքրքրություն էր ներկայացնում «Հանրապետական» մարզադաշտում երկրի չեմպիոն «Փյունիկի» եւ բրոնզե մրցանակակիր «Բանանցի» մրցավեճը: Առաջին շրջանի թիմերի հանդիպումն ավարտվել էր փյունիկցիների խոշոր հաշվով (5-2) հաղթանակով: Հաշվետու խաղում էլ «Բանանցը» խաղադաշտ էր դուրս բերել երիտասարդ մի խումբ ֆուտբոլիստների: Ինչպես հայտնի է, թիմի մարզիչները հրաժարվել են մի քանի լեգեոներների ծառայությունից եւ հիմնական շեշտը դրել են ակումբի երիտասարդ կադրերի վրա: Առաջ անցնելով նշենք, որ այս անգամ «Բանանցը» վատ տպավորություն չթողեց եւ կարողացավ լուրջ դիմադրություն ցույց տալ չեմպիոնին: Վերջինիս կազմում էլ իրենց նորամուտը նշեցին երիտասարդ դարպասապահ Էդգար Գասպարյանն ու Նորայր Սահակյանը:
Ֆուտբոլասերներն ականատես եղան տարբեր խաղակեսերի: Առաջին խաղակեսում երկու թիմերի գործողություններում պակասում էին սրությունը, կոմբինացիոն խաղը: Այդպես էլ մրցակիցներին չհաջողվեց գոլային որեւէ պահ ստեղծել: Թերեւս հիշատակության է արժանի փյունիկցի Տիգրան Դավթյանի հեռահար հարվածը, որը որսաց դարպասապահը: Մի դրվագում էլ «Բանանցի» ֆուտբոլիստ Տիգրան Ղարաբաղցյանն օգտվելով պաշտպանի սխալից, ընթանում էր դեպի դարպասը, սակայն չկարողացավ ճշգրիտ փոխանցում կատարել խաղընկերոջը:
Իսկ ահա ընդմիջումից հետո խաղի պատկերը կտրուկ փոխվեց: Երկու թիմերն էլ իրենց գործողություններին բարձր տեմպ հաղորդեցին: Ճիշտ է, ավելի շատ գրոհում էին «Փյունիկի» ֆուտբոլիստները, սակայն «Բանանցի» հակագրոհներն ավելի սուր ու վտանգավոր էին: 49-րդ րոպեին կարող էր աչքի ընկնել «Բանանցի» փորձառու հարձակվող Արամ Հակոբյանը, որը մեն-մենակ դուրս եկավ դարպասապահի դիմաց, սակայն վերջինս հասցրեց փակել գնդակի ուղղությունը: 4 րոպե անց հյուրերը տուգանային հարվածի իրավունք ստացան: Սամվել Մելքոնյանն ուժգին հարվածով գնդակն ուղարկեց դարպասը, բայց գերազանց խաղաց դարպասապահ Իվարդավանՙ գեղեցիկ ցատկով հետ մղելով գնդակը: «Փյունիկը» մոտ էր հաջողությանը 58-րդ րոպեին, երբ Տիգրան Դավթյանը մոտ տարածությունից գնդակն ուղարկեց դարպասը, սակայն «Բանանցին» օգնության եկավ դարպասաձողը: Հետագայում էլ երկու թիմերի գրոհներն արդյունք չտվեցին: Այսպիսով, չեմպիոնը եւս երկու կարեւոր «ոսկե» միավոր կորցրեց: Ընդհանրապես վերջին հանդիպումներում, երբ թիմի ղեկն ստանձնել է հոլանդացի Հենկ Վիսմանը, «Փյունիկին» միավորները դժվարությամբ են տրվում: Հոլանդացի մասնագետի գլխավորությամբ անցկացված երեք հանդիպումներից երկուսն ավարտվել են ոչ-ոքի, մեկում «Փյունիկը» հաղթանակ է կորզել լրացուցիչ ժամանակում: Ինչ խոսք, չեմպիոնի միավորների այս կորուստը կնպաստի առաջնության երկրորդ փուլում մրցանակային տեղերի համար պայքարի լարվածության աճին:
Ոսկեհատում «Լեռնագործը» հյուրընկալել էր «Էսթեղլալ-Կոտայքին»: Մրցակիցների առաջին շրջանի հանդիպումն ավարտվել էր ոչ-ոքի: Այս անգամ էլ բավական ժամանակ հավասարակշռությունը պահպանվում էր: Ավելին, 49-րդ րոպեին հաշիվը բացել էր «Լեռնագործը» (Ալբերտ Ներսիսյան): Կոտայքցիներից 18 րոպե պահանջվեց հավասարակշռությունը վերականգնելու համար: Աչքի ընկավ Արսեն Բալաբեկյանը: Հենց նա էլ խաղավարտից 9 րոպե առաջ խփեց երկրորդ գնդակը: Իսկ քիչ անց կոտայքցիների ռմբարկու Սամվել Պետրոսյանն ամրապնդեց թիմի հաղթանակը:
Մրցաշարային աղյուսակ
| Խ | Հ | Ո | Պ | Գ | Մ | |
| 1. Փյունիկ | 11 | 8 | 3 | 0 | 20-5 | 27 |
| 2. Միկա | 11 | 7 | 3 | 1 | 17-6 | 24 |
| 3. Բանանց | 10 | 6 | 2 | 2 | 12-10 | 20 |
| 4. Էսթ.-Կոտայք | 11 | 5 | 5 | 1 | 19-8 | 20 |
| 5. Կիլիկիա | 10 | 3 | 3 | 4 | 15-14 | 12 |
| 6. Լ. Արցախ | 11 | 3 | 0 | 8 | 14-22 | 9 |
| 7. Դին.-Զենիթ | 11 | 2 | 3 | 6 | 10-15 | 9 |
| 8. Շիրակ | 11 | 2 | 2 | 7 | 13-24 | 8 |
| 9. Լեռնագործ | 10 | 1 | 1 | 8 | 4-20 | 4 |
Ռմբարկուները
| Արտյոմ Ադամյան «Միկա» | 7 |
| Նշան Էրզրումյան «Կիլիկիա» | 6 |
| Սամվել Պետրոսյան «Է. Կոտայք» | 6 |
| Էդգար Մանուչարյան «Փյունիկ» | 5 |
ԱՇՈՏ ՀԱՅՐԱՊԵՏՅԱՆ