Առաջնության 17-րդ տուրի բոլոր երեք հանդիպումներն էլ ավարտվեցին առաջատարների հաղթանակներով: «Փյունիկը» «Հրազդան» մարզադաշտում հյուրընկալվել էր «Կիլիկիային»: Չեմպիոնի կազմում բացակայում էին Սարգիս Հովսեփյանն ու Աղվան Մկրտչյանը, իսկ «Կիլիկիայի»» մեկնարկային կազմում մարզիչները չէին ընդգրկել առաջնության լավագույն ռմբարկու Նշան Էրզրումյանին: Վերջինս խաղադաշտ մտավ ընդմիջումից քիչ անց եւ զգալիորեն ուժեղացրեց թիմի հարձակողական գործողությունները: Հենց նրա ջանքերով էլ առաջին գոլային լուրջ պահը ստեղծվեց «Փյունիկի» դարպասին, սակայն հարվածն իր վրա ընդունեց դարպասաձողը: Քիչ անց Սարգիս Մովսիսյանը կարող էր բացել հաշիվը, սակայն նրա հարվածից հետո էլ գնդակը դիպավ հորիզոնական ձողին:
Իսկ ահա «Փյունիկն» ավելի հաջողակ գտնվեց եւ հանդիպման վերջին 20 րոպեներին կարողացավ 3 անգամ գրավել «Կիլիկիայի» դարպասը: Երկու անգամ աչքի ընկավ Մամադու Դիավարան, մեկ գնդակ էլ խփեց երիտասարդ Նորայր Սահակյանըՙ բացելով գոլերի հաշիվը բարձրագույն խմբում:
Երկրորդ տեղում ընթացող «Միկան» էլ հաջողության հասավ հյուրընկալվելիսՙ Գյումրիում 2-1 հաշվով պարտության մատնելով «Շիրակին»: «Միկայից» գոլերը խփեցին Մաքսիմ Մորոզովն ու Տիգրան Դավթյանը, շիրակցիներից միակ պատասխան գոլի հեղինակը Վահան Մառանջյանն էր: «Բանանցը» եւս հաղթանակ տոնեց, սակայն այն ձեռք բերվեց մեծ ջանքերի գնով: Առաջին խաղակեսում Ռաֆայել Մկրտչյանի խփած գոլի շնորհիվ «Դինամո-Զենիթը» խաղը շահում էր 1-0 հաշվով: Եվ միայն 75-րդ րոպեին «Բանանցին» հաջողվեց վերականգնել հավասարակշռությունը: Աչքի ընկավ Վահե Դավթյանը: Քիչ անց Տիգրան Ղարաբաղցյանն առաջ մղեց «Բանանցին», իսկ ավելացված ժամանակում Ռոմեո Ջենեբյանը խփեց 3-րդ գնդակըՙ 3-1:
Մրցաշարային աղյուսակ
| Խ | Հ | Ո | Պ | Գ | Մ | |
| 1. Փյունիկ | 14 | 10 | 4 | 0 | 28-5 | 34 |
| 2. Միկա | 15 | 9 | 5 | 1 | 25-11 | 32 |
| 3. Բանանց | 14 | 8 | 4 | 2 | 23-16 | 28 |
| 4. Էսթ.-Կոտայք | 14 | 6 | 6 | 2 | 26-14 | 24 |
| 5. Կիլիկիա | 15 | 6 | 3 | 6 | 29-23 | 21 |
| 6. Դին.-Զենիթ | 15 | 4 | 3 | 8 | 19-21 | 15 |
| 7. Շիրակ | 14 | 3 | 2 | 9 | 17-27 | 11 |
| 8. Լեռնագործ | 15 | 3 | 1 | 11 | 8-34 | 10 |
Ռմբարկուները
| Նշան Էրզրումյան | «Կիլիկիա» | 11 |
| Արտյոմ Ադամյան | «Միկա» | 8 |
| Սամվել Պետրոսյան | «Է.-Կոտայք» | 6 |
| Արման Մինասյան | «Է.-Կոտայք» | 6 |
| Սարգիս Մովսիսյան | «Կիլիկիա» | 6 |
ԱՇՈՏ ՀԱՅՐԱՊԵՏՅԱՆ