Գեղեցկուհի Լուսինե Թովմասյանը Հայաստանը որպես «քնած գեղեցկուհի» է ներկայացնում Լիբանանի LBC հեռուստաընկերության նկարահանած ֆիլմում, որն արդեն արաբերենից թարգմանվել է ֆրանսերեն, անգլերեն եւ շուտով կտարածվի տարբեր երկրներում, հատկապես Ֆրանսիայում, որտեղ 2006-ը հայտարարված է Հայաստանի տարի: Մեր երկրում զբոսաշրջությունը զարգացնելու նպատակով նկարահանված ֆիլմին աջակցել են «Զբոսաշրջության զարգացման հայկական գործակալությունն» ու լիբանանահայ գործարար եղբայրներ Տիրան եւ Պիեռ Բաղդադյանները:
«Հայաստանի մասին օտարների գիտելիքները չափազանց նվազ են: Նրանք մեր երկիրը պատկերացնում են խեղճ, աղքատ ու հետամնաց, անընդհատ պատերազմի սպառնալիքի տակ: Մեր նպատակն էր տեսաֆիլմի միջոցով ցույց տալ, որ մենք զարգացած ենք ու աղքատ չենք», ասաց հիշյալ գործակալության տնօրեն Նինա Հովնանյանըՙ տեսաֆիլմի առաջին ցուցադրության առիթով երեկ «Արմենիա-Մարիոթ» հյուրանոցում հրավիրած մամլո ասուլիսում:
Անցած տարվա հունիսին նկարահանված «Հայաստան... քնած գեղեցկուհի» 50 րոպե տեւողությամբ ֆիլմում Լուսինեն պատմում է մեր երկրի պատմամշակութային հուշարձանների մասին, շրջում է քաղաքներում ու գյուղերում, ցուցադրում Երեւանի զվարճանքի կենտրոնները:
Բաղդադյան եղբայրների կարծիքով, այսպիսի ֆիլմեր պետք է շատ նկարահանվեն եւ տարածվեն, որպեսզի Հայաստանի գրավչությունը ճանաչելի դառնա բոլոր երկրներում:
Ֆիլմի DVD տարբերակը թողարկվել է մոտ 2 հազար տպաքանակով: Ֆիլմի պրեմիերան տեղի կունենա «Մոսկվա» կինոթատրոնում, երեքշաբթի, ժամը 19-ին:
Ռ. Պ.