ԵՐԵՎԱՆ, 17 ՕԳՈՍՏՈՍ, ՆՈՅՅԱՆ ՏԱՊԱՆ: «Ես այցելում եմ Հարավային Կովկաս, որովհետեւ Եվրոպայի ամենազգայուն տարածաշրջաններից մեկն է, իսկ այդ տարածաշրջանի երկրները` Եվրոպայի խորհրդի անդամ»: Տարածաշրջան կատարելիք այցի նախօրեին` օգոստոսի 17-ին, «Ազատություն» ռադիոկայանին տված բացառիկ հարցազրույցում ասել է ԵԽԽՎ նախագահ Ռենե վան դեր Լինդենը: Ըստ նրա, առաջիկայում տարածաշրջանում տեղի են ունենալու կարեւոր իրադարձություններ, մասնավորապես նոյեմբերին Ադրբեջանում տեղի ունենալիք խորհրդարանական ընտրությունները: Նա ցանկություն է հայտնել բաց խոսակցություն ունենալ ԵԽ-ի առջեւ անդամ-երկրների ստանձնած պարտականությունների եւ հանձնառությունների մասին: Հայաստանի մասով ԵԽԽՎ-ի նախագահը հատկապես կարեւորել է Ղարաբաղի հակամարտության խաղաղ կարգավորման, Հայաստանում այսուհետեւ միայն ազատ ու արդար ընտրությունների անցկացման, ինչպես նաեւ երկրում լավ կազմակերպված ընդդիմության անհրաժեշտությունը: Ըստ Ռենե վան դեր Լինդենի, անհրաժեշտ է նաեւ, որ ԵԽ-ի բոլոր առաջարկություններն ու պահանջները ընդունվեն եւ կատարվեն, քանզի այդպիսով Հայաստանը ցույց կտա միջազգային հանրությանը, որ պատկանում է ժամանակակից Եվրոպային: