Հայկական բարեգործական ընդհանուր միության Մոնրեալի մասնաճյուղի վարչությունից ուղարկված հաղորդագրությունից տեղեկացանք, որ վարչության հովանավորությամբ գործող հայագիտական դասընթացներն այս տարի նվիրվել են մաշտոցյան գրերի գյուտի 1600-ամյակին: Ազգային բարեգործ Ժիրայր Դերվիշյանի, բանաստեղծ, գրականագետ, դասախոս Մանվել Քյոսեյանի ջանքերով ստեղծված դասընթացն այս տարի անցել է հրաշալի մթնոլորտում: Մասնակցել են ուսանողներ, կրթության աշխատողներ, արվեստագետներ, ազգային գործիչներ եւ ուրիշներ: Դասընթացն ընդգրկել է հայագիտության եւ մշակույթի տարբեր ոլորտներ: Առաջին դասախոսությունը նվիրվել է գրականագետ Լեւոն Միրիջանյանի հիշատակին, մեծարվել է նրա «Մեր Մեծասքանչը» գիրքը, որն անցած տարի Երեւանում լույս էր տեսել Ժիրայր Դերվիշյանի մեկենասությամբ: Հայկական պարարվեստի մասին դասախոսություն է կարդացել Ռուդոլֆ Խառատյանը, Հայաստանի տնտեսական վիճակի մասինՙ Հրաչ Գասպարը, հայկական գաղութների եւ սփյուռքահայ գրականության ստեղծման մասինՙ Մանվել Քյոսեյանը: Վերջինս ներկայացրել է նաեւ Պարիս Հերունու «Հայերը եւ հնագույն Հայաստանը» գիրքը: 7 ամիսներին ընթերցվել է ավելի քան 25 դասախոսություն, ցուցադրվել են Հայաստանի եւ սփյուռքի ազգային-մշակութային կյանքի մասին պատմող ժապավեններ:
Ռ. Պ.