Սեպտեմբերի 10-ին «Ազգը» տեղեկացրել էր, որ Նիգերիայի դատարանը գրավի դիմաց որոշել է ազատ արձակել նավթի մաքսանենգության մեղադրանքով 2003 թ. հոկտեմբերի 8-ին ձերբակալված 12 ռուս նավաստիներին: Թերթը նաեւ մեջբերել էր ՅՈՒՆԵՍԿՕ-ի բարի կամքի դեսպան Արա Աբրահամյանի այն խոսքերը, թե երկուշաբթի օրը նրանք ազատ կարձակվեն եւ վերջնական դատավճռին կսպասեն Նիգերիայում ՌԴ դեսպանատանը կամ առեւտրային ներկայացուցչությունում:
Այդպես էլ եղավ: Երեկ ՌԻԱ գործակալությունը հաղորդեց, որ ռուս նավաստիների արձակման որոշումն ընդունված է: «Նիգերիայում իմ ներկայացուցիչը եւ ռուս նավաստիների նոր փաստաբանը բանտ են մեկնում նրանց վերցնելու, որպեսզի ՌԴ առեւտրային ներկայացուցչության տարածքում ապրեն մինչեւ վերջնական դատավճռի կայացումը», հեռախոսով հայտնեց Արա Աբրահամյանը:
ՌԴ ԱԳՆ-ի հետ սերտորեն գործակցող Արա Աբրահամյանը նավաստիների արձակումը համարում է ռուսական դիվանագիտության հաղթանակ: «Անկախ դատարանի վճռից, վերջին խոսքը Նիգերիայի նախագահինն է», ընդգծել է նա: