Կարճատեւ ընդմիջումից հետո վերսկսվեց ֆուտբոլի Հայաստանի բարձրագույն խմբի առաջնությունը: Տուրի կենտրոնական հանդիպումը Ոսկեհատում «Միկայի» եւ «Փյունիկի» մրցավեճն էր: Փյունիկցիների հաղթանակի դեպքում վերջին 4 տարիների անփոփոխ չեմպիոնը ժամկետից շուտ իր համար կապահովեր հերթական ոսկե մեդալները: Այնպես որ այդ հանդիպման արդյունքը բավական մեծ նշանակություն ուներ մեդալների համար մղվող պայքարի ելքի վրա: Համառ մրցակցությունում անցած խաղում հաջողությունն ուղեկցեց փյունիկցիներին, որոնք հաղթելով 2-1 հաշվովՙ գործնականում լուծեցին չեմպիոնության հարցը: Թեեւ մինչեւ առաջնության ավարտը դեռեւս կա 8 տուր: 25-րդ եւ 32-րդ րոպեներին փյունիկցի Աղվան Մկրտչյանը երկու անգամ դիպուկ իրացրեց 11 մ հարվածներըՙ առաջ մղելով իր թիմին: 54-րդ րոպեին պատասխան գնդակը խփեց Արմեն Շահգելդյանը: Նշենք, որ 26-րդ րոպեին դաշտից հեռացվեց «Միկայի» պաշտպան Արսեն Մելոյանը եւ մնացած ժամանակահատվածում թիմը խաղում էր 10 հոգով:
Հերթական տուրում «Կիլիկիան» հյուրընկալվել էր «Բանանցին»: Եթե «Բանանցի» ֆուտբոլիստները պայքարում են մրցանակային տեղերի համար, ապա «Կիլիկիային» շատ դժվար է հավակնել մեդալներիՙ հաշվի առնելով միավորների նվազագույն պաշարը: Սակայն դա չխանգարեց կիլիկիացիներին համոզիչ հաղթանակի հասնելու մրցակցի նկատմամբ: Ողջ հանդիպումը «Կիլիկիան» անցկացրեց գրոհների նշանաբանով: Իրենց տարերքի մեջ էին թիմի առաջատար ֆուտբոլիստներ Էրզրումյան եղբայրները, որոնք էլ դարձան «Բանանցի» դարպասը խփված 3 գոլերի հեղինակներ: 2 գոլ խփեց Նշանը, 1 անգամ էլ աչքի ընկավ Սերգեյը:
«Բանանցը» եւս ունեցավ դարպասը գրավելու հարմար առիթներ: Մասնավորապես 2 անգամ կարող էր աչքի ընկնել Արամ Հակոբյանը, սակայն մի դեպքում նրա գլխի հարվածը դիպավ դարպասաձողին, իսկ մյուս դրվագում մեն-մենակ հայտնվելով դարպասապահի դիմաց, թույլ հարվածեց: Խաղավերջում էլ գոլային 2 պահ չօգտագործեց Վահե Թադեւոսյանը: Բայց ի տարբերություն Արամի, Վահեն վերջին րոպեին «թրջեց» հաշիվը (3-1):
«Էսթեղլալ-Կոտայքի» ֆուտբոլիստները հյուրընկալվելիս 2 անպատասխան գնդակ խփեցին «Դինամո-Զենիթի» դարպասը: 53-րդ րոպեին հաշիվը բացեց Արսեն Բալաբեկյանը, 4 րոպե անց Սամվել Պետրոսյանը 2-րդ անգամ գրավեց մրցակցի դարպասը: Այս հաղթանակի շնորհիվ կոտայքցիներն ընդհուպ մոտեցան առաջատարներին եւ լավ հնարավորություններ են պահպանում պայքարելու մրցանակային տեղերի համար:
Մրցաշարային աղյուսակ
| Խ | Հ | Ո | Պ | Գ | Մ | |
| 1. Փյունիկ | 12 | 8 | 4 | 0 | 23-5 | 28 |
| 2. Միկա | 12 | 4 | 6 | 2 | 16-11 | 18 |
| 3. Բանանց | 12 | 4 | 5 | 3 | 15-16 | 17 |
| 4. Էսթ.-Կոտայք | 12 | 3 | 7 | 2 | 14-11 | 16 |
| 5. Կիլիկիա | 12 | 2 | 4 | 6 | 13-21 | 10 |
| 6. Դին.-Զենիթ | 12 | 1 | 2 | 9 | 8-25 | 5 |
Ռմբարկուները
| Նշան Էրզրումյան | «Կիլիկիա» | 13 |
| Արտյոմ Ադամյան | «Միկա» | 8 |
| Աղվան Մկրտչյան | «Փյունիկ» | 8 |
| Տիգրան Դավթյան | «Փյունիկ» | 7 |
| Սամվել Պետրոսյան | «Է.-Կոտայք» | 7 |
ԱՇՈՏ ՀԱՅՐԱՊԵՏՅԱՆ