Հայաստանի ֆուտբոլի ֆեդերացիայի մամլո քարտուղարությունը տեղեկացնում է, որ «Սպորտ էքսպրես» թերթն իր սեպտեմբերի 19-ի համարում անդրադառնալով «Ամկարի» պարտությանը նշել է. «...չկարողացավ խաղալ Ալբերտ Սարգսյանը: Պատրաստվում էր հիվանդ ոտքով վիրահատության մեկնել Գերմանիա, իսկ Հայաստանի ֆուտբոլի ֆեդերացիան չի վերադարձնում արտասահմանյան անձնագիրը: Վիճել են: Եվ հիմա խեղճ Սարգսյանը փորձում է վերադարձնել անձնագիրը` գրեթե ներգրավելով ՖԻՖԱ-ին...»:
Այս տեղեկատվությունը արտատպվել է «Ֆուտբոլ +» թերթում:
Ալբերտ Սարգսյանի հետ կապված հերթական թյուրիմացությունից խուսափելու համար ՀՖՖ-ի մամուլի քարտուղարությունը տեղեկացնում է, որ նրա հետ որեւէ մեկը չի վիճել: Ալբերտ Սարգսյանը վերջին անգամ Հայաստան է հրավիրվել` մասնակցելու հունիսի 4-ի Հայաստան-Մակեդոնիա եւ հունիսի 8-ի` Ռումինիա-Հայաստան ընտրական հանդիպումների նախապատրաստական հավաքին: Այնուհետեւ Ալբերտ Սարգսյանը մասնակցել է Հայաստան-Մակեդոնիա հանդիպմանը, որից հետո, առանց Հայաստանի ֆուտբոլի ֆեդերացիային եւ ընդհանրապես որեւէ մեկին տեղեկացնելու, հավաքել է անձնական իրերը եւ թողել հավաքի վայր հյուրանոցը: Պաշտոնական հանդիպման հաջորդ իսկ օրը Հայաստանի ազգային հավաքականը մեկնել է Ռումինիա, իսկ Ալբերտ Սարգսյանը չի ժամանել օդանավակայան` անակնկալի բերելով ՀՖՖ-ի եւ ազգային հավաքականի ղեկավարությանը: Այդ մասին ժամանակին տրվել է նաեւ համապատասխան տեղեկատվություն:
Բնական է, որ Հայաստանի ֆուտբոլի ֆեդերացիան չի կարող պատասխանատվություն կրել Ալբերտ Սարգսյանի անձնական իրերի, այդ թվում եւ նրա արտասահմանյան անձնագրի համար: Զարմանալի է, որ միայն ամիսներ հետո է Ալբերտ Սարգսյանը հիշում իր անձնագրի մասին:
ԱՇՈՏ ՀԱՅՐԱՊԵՏՅԱՆ