«Հազարավոր դարերի մեր քաղաքակրթությունը իր հետքերն է թողել Անատոլիայում: Բազում հայկական հուշարձաններ հասել են 21-րդ դարՙ հակառակ դրանք ոչնչացնելու փորձերին: Ես դրանք համարում եմ անցյալի հոգնատանջ վկաները, որովհետեւ ինչպիսի քայքայված վիճակում էլ լինեն, նրանք շարունակում են հպարտորեն գոյատեւել»: Այս միտքը տարբեր քաղաքներում իր ելույթների ժամանակ շեշտել է «Ակօս» թերթի մշակույթի բաժնի վարիչ, «Հայկական նկարչությունը սկզբից մինչեւ մեր օրերը» գրքի հեղինակ Մայդա Սարիսը, որը նոյեմբերի սկզբից շրջագայության էր դուրս եկել ԱՄՆ-ում եւ Կանադայումՙ հասարակությանը ներկայացնելու իր նոր գիրքը:
Լոս Անջելես, Բեյրութ, Նյու Յորք, Ֆիլադելֆիա եւ Մոնրեալ քաղաքների այցելությունները հովանավորել են տեղի պոլսահայերի կազմակերպությունները, Չիկագո այցելությունըՙ տեղի ՀԲՄԱ-ի մասնաճյուղը, իսկ Նյու Յորք այցելությունըՙ Գրիգոր եւ Կլարա Զոհրապ տեղեկատվական կենտրոնը, հաղորդում է «Արմինյն միրոր սփեքթեյթր» շաբաթաթերթը:
264 էջանոց հատորը պարունակում է 400 գեղեցիկ նկարներ, 48 գլուխ, որոնցից մեկըՙ «Հայ նկարիչները օսմանյան մայրաքաղաքում» հատկանշական է նրանով, որ ներկայացնում է Մանաս ընտանիքին, որի 7 անդամները 2 դար շարունակ եղել են օսմանյան պալատի ծառայության մեջ կա՛մ որպես նկարիչներ, կա՛մ որպես գրագիրներ: Այլ նկարիչների շարքում հեղինակը նշում է նաեւ գեղարվեստի դպրոցի հիմնադիր Երվանդ Օսկան էֆենդիի անունը: Գիրքն ընդգծում է նաեւ հայ նկարիչների այբբենական ցանկը, նրանց մասին կենսագրական տվյալների հանրագիտարանների կամ բառարանների ցուցակը:
Իր այցելությունների ընթացքում Մայդա Սարիսը ջերմ հանդիպումներ է ունեցել հայ համայնքի ներկայացուցիչների, Ամերիկայի հայկական գրադարանի եւ թանգարանի տնօրենների, ինչպես նաեւ մշակութային հաստատությունների աշխատողների հետ:
Հ. Ծ.