Իլհամ Ալիեւը հանդիպում է իսլամական երկրների նախագահների հետ
Մահմեդականների Մեքքա սրբավայր քաղաքում շարունակվում է Իսլամական համաժողով կազմակերպության (ԻՀԿ) գագաթաժողովը, որին մասնակցում է նաեւ Ադրբեջանի ղեկավար Իլհամ Ալիեւը: Ըստ Բաքվի «Էխո» թերթի, կազմակերպության անդամ երկրների նախագահները համատեղ նամազ են արել:
Ադրբեջանի ղեկավարը համաժողովի շրջանակներում անցկացնում է երկկողմ հանդիպումներ: Մասնավորապես արդեն տեղի են ունեցել Ալիեւի հանդիպումները Պակիստանի առաջնորդ Փերվեզ Մուշարաֆի, Իրանի առաջնորդ Մահմուդ Ահմադինեժադի, Աֆղանստանի եւ Տաջիկստանի նախագահներ Համիդ Կարզայի եւ Էմոմալի Ռահմոնովի հետ:
Սովորաբար իսլամական համաժողովների ավարտին ընդունվում է բանաձեւ ղարաբաղյան կարգավորման վերաբերյալ, որում դատապարտվում է «հայկական ագրեսիան Ադրբեջանի նկատմամբ»: Ընդ որում, այդ փաստաթուղթը ստորագրում են կազմակերպության անդամ բոլոր երկրները, այդ թվում մեր հարեւան Իրանը, Հավաքական անվտանգության պայմանագրի կազմակերպության (ՀԱՊԿ) անդամներից Ղազախստանը, Կիրգիզիան եւ Տաջիկստանը:
Իսլամական համաժողով կազմակերպությունում դիտորդի կարգավիճակ ունի Հայաստանի ռազմավարական դաշնակից համարվող Ռուսաստանը: Ի դեպ, մի քանի օր առաջ Ռուսաստանի արտգործնախարար Սերգեյ Լավրովը կոնկրետ պատասխան չի տվել այն հարցին, թե ինչու են ՀԱՊԿ որոշ անդամներ ստորագրում ԻՀԿ հակահայկական բանաձեւերը:
Թ. Հ.