Մոսկվայում ավարտվեց «Համագործակցության գավաթի» խաղարկության նախնական փուլը: Հայտնի դարձան այն 8 ուժեղագույն ակումբները, որոնք կշարունակեն պայքարը քառորդ եզրափակիչում: Ուրախալի է, որ այդ թիմերի շարքում է նաեւ ՀՀ չեմպիոն «Փյունիկը», որն իր պատմության մեջ 3-րդ անգամ (նախկինումՙ 1997, 2005 թթ.) մոսկովյան մրցաշարում հաղթահարեց նախնական փուլի արգելքը:
«D» խմբում հանդես եկող «Փյունիկն» ավարտական տուրում ուժերը չափեց հաշվարկից դուրս հանդես եկող ՌԴ պատանեկան հավաքականի հետ: Խաղասկիզբը հաջող դասավորվեց փյունիկցիների համար: Արթուր Աղասյանի հարվածի շնորհիվ «Փյունիկը» հաշվի մեջ առաջ անցավ: Սակայն մեր թիմին ոչ միայն չհաջողվեց զարգացնել հաջողությունը, այլեւ պահպանել հաղթական հաշիվը: Ռուսաստանցի պատանի ֆուտբոլիստները 2 գոլ խփեցին եւ խաղը շահեցին 2-1 հաշվով:
Մյուս խաղում «Կաունասն» ու Սոլիգորսկի «Շախտյորը» միմյանց դարպասները մեկական գնդակ խփեցին: Խաղը ավարտվեց ոչ-ոքի (1-1), ինչն ի վերջո ձեռնտու էր ... «Փյունիկին»: Բանն այն է, որ ՌԴ պատանեկան հավաքականը հանդես է գալիս հաշվարկից դուրս եւ նրա մասնակցությամբ հանդիպումների արդյունքները հաշվի չեն առնվում քառորդ եզրափակիչի ուղեգրերի տերերին որոշելիս: Քանի որ «Շախտյորը» միակ հաղթանակը տոնել էր հենց ՌԴ պատանեկան հավաքականի նկատմամբ, ուստի այդ 3 միավորը չի հաշվվում: Այդ դեպքում, «Շախտյորի» հաշվին գրանցված է միայն մեկ միավոր, իսկ «Փյունիկն» ունի 3 միավոր: Այսպիսով, թեեւ պարտությանը, «Փյունիկը» մտավ հաջորդ փուլ: Այսօր փյունիկցիները քառորդ եզրափակիչում կհանդիպեն Մոլդովայի չեմպիոնիՙ «Շերիֆի» հետ: Քառորդ եզրափակիչի մյուս զույգերը կազմել են «Պախտակորն» ու «Նեւթչին», Դոնեցկի «Շախտյորն» ու «Կաունասը», ԲԿՄԱ-ն ու «Մետալուրգը»:
3-րդ տուրում գրանցվեցին հետեւյալ արդյունքները. ԲԿՄԱ-« Պախտակոր»ՙ 4-3, «Դինամո» Թբ.-ՏՖՄԿՙ 0-0, «Մետալուրգ»-«Վախշ»ՙ 2-1, «Նեւթչի»-«Ակտոբե»ՙ 1-1, «Շերիֆ»-«Դորդոյ-Դինամո»ՙ 7-0, « Շախտյոր» Դ.-ՄՏՏՈւՙ 5-1, «Կաունաս»-«Շախտյոր» Ս.ՙ 1-1:
Մրցաշարային աղյուսակներ
«A» խումբ
| Խ | Հ | Ո | Պ | Գ | Մ |
«B» խումբ
| Խ | Հ | Ո | Պ | Գ | Մ | |
| 1. Նեւթչի | 3 | 2 | 1 | 0 | 6-2 | 7 |
| 2. Մետալուրգ | 3 | 2 | 0 | 1 | 6-3 | 6 |
| 3. Ակտոբե | 3 | 1 | 1 | 1 | 2-4 | 4 |
| 4. Վախշ | 3 | 0 | 0 | 3 | 1-6 | 0 |
«C» խումբ
| Խ | Հ | Ո | Պ | Գ | Մ | |
| 1. Շերիֆ | 3 | 2 | 0 | 1 | 10-3 | 6 |
| 2. Շախտյոր Դ. | 3 | 2 | 0 | 1 | 8-4 | 6 |
| 3. ՄՏՏՈՒ | 3 | 2 | 0 | 1 | 4-5 | 6 |
| 4. Դորդոյ-Դին. | 3 | 0 | 0 | 3 | 0-10 | 0 |
«D» խումբ
| Խ | Հ | Ո | Պ | Գ | Մ | |
| 1. ՌԴ պ. հավ. | 3 | 2 | 0 | 1 | 3-4 | 6 |
| 2. Կաունաս | 3 | 1 | 1 | 1 | 4-2 | 4 |
| 3. Շախտյոր Ս. | 3 | 1 | 1 | 1 | 4-3 | 4 |
| 4. Փյունիկ | 3 | 1 | 0 | 2 | 3-5 | 3 |
ԱՇՈՏ ՀԱՅՐԱՊԵՏՅԱՆ