50,8 կգ քաշային կարգում IBF-ի եւ IBO-ի վարկածներով աշխարհի չեմպիոն Վախթանգ Դարչինյանը պայմանագիր է կնքել ամերիկացի հանրահայտ մենեջեր Հերի Շոուի հետ: Այսուհետեւ նա է կազմակերպելու հայ բռնցքամարտիկի մենամարտերը: Մոտակա ծրագրերից են WBC-ի վարկածով աշխարհի ժամանակավոր չեմպիոն Խորխե Արսեի, ինչպես նաեւ քաշային այլ կարգերի մի քանի բռնցքամարտիկների հետ մենամարտերի կազմակերպումը:
Շոուն մեծ գոհունակություն է հայտնել կնքած գործարքից. «Վախթանգի հետ պայմանագիր կնքելն ավելի մեծ ուրախություն է պատճառում ինձ, քան եթե ադամանդ գտնեի: Նա կարող է անվանի չեմպիոն դառնալ քաշային մի քանի կարգերում: Պարզապես ներկայումս նրա մասին ոչ ոք չգիտի, իսկ երբ իմանան, նրա համար ամեն ինչ կփոխվի: Իմ կարծիքով Վախթանգն այն անհայտ բռնցքամարտիկներից է, ինչպիսին մի քանի տարի առաջ Մենի Պակիաոն էր: Երբ հանդիսատեսն ականատես դառնա նրա մենամարտերին, իսկույն կհասկանա, թե իրականում ով է Վախթանգ Դարչինյանը: Կարծում եմ, Վախթանգը մինչ օրս արժանի ճանաչման չի արժանացել եւ ես իրոք ուրախ եմ, որ նա ընդգրկվեց իմ թիմում»:
Հիշեցնենք, որ մարտի 3-ին ԱՄՆ-ում Վախթանգ Դարչինյանը ֆիլիպինցի Դիոսադո Գաբիի հետ մենամարտում կփորձի պաշտպանել աշխարհի չեմպիոնի իր տիտղոսը:
ԱՇՈՏ ՀԱՅՐԱՊԵՏՅԱՆ