Եկատերինբուրգում ընթացող շախմատի աշխարհի կանանց առաջնությունում սկսվել են 2-րդ փուլի հանդիպումները: Մինչ դրանց անդրադառնալը, նշենք մի ցավալի վրիպակի մասին, որ տեղ էր գտել նախորդ օրը Chesspro.ru ինտերնետային կայքում: Ըստ այդ կայքի տեղեկատվության, առաջին փուլում Մկրտչյանը 2,5-1,5 հաշվով հաղթել էր չին շախմատիստուհի Ժուան Լուֆեյին: Բայց ցավոք իրականում նման հաշվով հաղթել է չին շախմատիստուհին եւ Լիլիթ Մկրտչյանը դուրս է մնացել հետագա պայքարից: Հայցում ենք ընթերցողների ներողամտությունը:
Երկրորդ փուլի առաջին պարտիայում Էլինա Դանիելյանը պարտվեց աշխարհի փոխչեմպիոնուհի Ալեքսանդրա Կոստենյուկին: Աշխարհի ներկայիս չեմպիոնուհի Անտոանետա Ստեֆանովան հաջող մեկնարկեց` առավելության հասնելով Իվետա Ռաձիեւիչի նկատմամբ: Ժուան Լուֆեյը ոչ-ոքի ավարտեց պարտիան Վիկտորյա Չմիլիտեի հետ: Խաղաղ դաշն կնքեցին նաեւ Կոներուն ու Սեբան, Ուշենինան ու Յուհուան, Խուրցիձեն ու Արիբասը, Ձագնիձեն ու Վենցզյունը, Հուսկան ու Կանյինը: Լուխան-Գալյամովա, Կովալեւսկայա-Կուրսովա, Կոսինցեւա-Կրուշ, Ջավախիշվիլի-Վիջայալակշմի, Իֆան-Ժուկովա, Մատվեեւա-Սապատա, Չիբուրդանիձե-Արախամիա, Չժաոցին-Կրամլինգ պարտիաներում հաղթեցին զույգերում առաջինը նշված շախմատիստուհիները:
ԱՇՈՏ ՀԱՅՐԱՊԵՏՅԱՆ