«ԱԶԳ» ՕՐԱԹԵՐԹ

«ՄԻԿԱՆ» ԱՎԱՐՏԵՑ ՀԵՐԹԱԿԱՆ ՀԱՎԱՔԸ

Հայաստանի գավաթակիր եւ արծաթե մրցանակակիր Աշտարակի «Միկան» ավարտելով ուսումնամարզական հավաքն Անթալիայում, վերադարձել է Երեւան: Մարզումներին զուգընթաց թիմն ընկերական հանդիպումներ է անցկացրել: Ինչպես տեղեկացանք ակումբից, «Միկայի» ֆուտբոլիստներն առաջին խաղում 3-1 հաշվով պարտության են մատնել Բելառուսի Ժոդինո քաղաքի «Տորպեդոյին» (3-1): Երկու գոլ է խփել «Միկայի» կազմում փորձաշրջան անցնող Ալեքսանդր Սեմյոնովը, մեկ անգամ էլ աչքի է ընկել թիմի ռմբարկու Արտյոմ Ադամյանը: Հաջորդ խաղը Ղազախստանի «Ժետեսուի» հետ ավարտվել է ոչ-ոքի (0-0): Երրորդ խաղում «Միկան» հաղթել է Լատվիայի «Վենտսպիլսին»: Առաջին խաղակեսում հաշիվը բացել է «Միկայի» լեգեոներ Վադիմ Գասպադարը, 2-րդ խաղակեսում Ալեքսանդր Սեմյոնովը կրկնապատկել է հաշիվը (2-0):

Երեւան վերադառնալուց առաջ հայ ֆուտբոլիստները չորրորդ խաղում 2-1 հաշվով պարտության են մատնել Բրեստի «Դինամոյին»: Այդ խաղում «Միկայից» աչքի են ընկել Արսեն Մելոյանն ու Արտյոմ Ադամյանը:

ԱՇՈՏ ՀԱՅՐԱՊԵՏՅԱՆ