Վերջնագիծը հատեցին շախմատի Հայաստանի բարձրագույն խմբի տղամարդկանց եւ կանանց առաջնությունները, որոնք աչքի ընկան պայքարի լարվածությամբ: Ավարտական տուրն անվանեց մրցանակակիրներին:
Դրամատիկ ելք ունեցավ կանանց առաջնությունը: Ողջ մրցաշարի ընթացքում առաջատարի դերն ստանձնած միջազգային գրոսմայստեր Նելլի Աղինյանին չհաջողվեց նվաճել չեմպիոնուհու տիտղոսը: Ավարտական տուրում Աղինյանին անհրաժեշտ էր կես միավոր վաստակել Լիլիթ Գալոյանի հետ պարտիայում: Վերջինիս համար էլ պարտիան կարեւոր նշանակություն ուներ, քանի որ հաղթանակի դեպքում կարող էր մրցանակակիր դառնալ: Նելլի Աղինյանը, որ մրցաշարում անպարտելի էր, վերջին տուրում զիջեց Լիլիթ Գալոյանին եւ ի վերջո 6,5 միավորով ճանաչվեց 2-րդը: Իսկ չեմպիոնուհու տիտղոսին արժանացավ էջմիածնեցի 20-ամյա շախմատիստուհի Սիրանուշ Անդրեասյանը, որը հաղթելով Նարինե Գասպարյանին, վաստակեց 7 միավոր: Սիրանուշն առաջին անգամ է արժանանում Հայաստանի չեմպիոնուհու տիտղոսին:
Համառ պայքար էր ծավալվել 3-րդ տեղի համար: Բրոնզե մեդալ նվաճելու համար Լիանա Աղաբեկյանին Անահիտ Խառատյանի հետ պարտիայում միայն հաղթանակ էր անհրաժեշտ: Սակայն երկարատեւ պայքարից հետո գրանցվեց ոչ-ոքի: Այսպիսով, 3-րդ տեղը 6 միավորով զբաղեցրեց Լիլիթ Գալոյանը:
Եթե կանանց մրցաշարի ավարտական տուրը լի էր անակնկալներով, ապա տղամարդկանց մրցաշարում ամեն ինչ իր հունով ընթացավ: Ինչպես եւ սպասվում էր, չեմպիոնի տիտղոսը նվաճեց Արտաշես Մինասյանը, որը ոչ-ոքի ավարտեց հանդիպումը Արսեն Եղիազարյանի հետ եւ վաստակեց 7 միավոր: Արտաշեսը 6-րդ անգամ նվաճեց Հայաստանի չեմպիոնի տիտղոսը: 2-րդ տեղը 6 միավորով զբաղեցրեց Արման Փաշիկյանըՙ հաղթելով Դավիթ Քալաշյանին: Փաշիկյանը 3-րդ անգամ լրացրեց գրոսմայստերի նորման եւ շուտով Հայաստանի գրոսմայստերների ընտանիքը նոր համալրում կստանա: Բրոնզե մրցանակակիր դարձավ Տիգրան Քոթանջյանը, որը հաղթելով Արա Մինասյանին, վաստակեց 5,5 միավոր եւ առաջին անգամ լրացրեց միջազգային գրոսմայստերի նորման:
Մրցաշարի ավարտից հետո կայացավ պարգեւատրման հանդիսավոր արարողությունը: Մրցանակակիրները պարգեւատրվեցին մեդալներով եւ դրամական պարգեւներով: Արտաշես Մինասյանը պարգեւատրվեց 1,5 մլն դրամով, Սիրանուշ Անդրեասյանըՙ 300 հազար դրամով:
Ներկայացնենք մրցաշարի ամփոփիչ արդյունքները:
Տղամարդիկ
| 1. Արտաշես Մինասյան | 7 |
| 2. Արման Փաշիկյան | 6 |
| 3. Տիգրան Քոթանջյան | 5,5 |
| 4. Աշոտ Անաստասյան | 5,5 |
| 5. Կարեն Ասրյան | 5,5 |
| 6. Տիգրան Պետրոսյան | 4,5 |
| 7. Տիգրան Նալբանդյան | 4,5 |
| 8. Արսեն Եղիազարյան | 3 |
| 9. Արա Մինասյան | 2 |
| 10. Դավիթ Քալաշյան | 1,5 |
Կանայք
| 1. Սիրանուշ Անդրեասյան | 7 |
| 2. Նելլի Աղինյան | 6,5 |
| 3. Լիլիթ Գալոյան | 6 |
| 4. Լիանա Աղաբեկյան | 5,5 |
| 5. Նարինե Գասպարյան | 5 |
| 6. Մարիանա Գասպարյան | 5 |
| 7. Անահիտ Խառատյան | 4,5 |
| 8. Նունե Դարբինյան | 3,5 |
| 9. Լուսինե Ալավերդյան | 1,5 |
| 10. Նաիրա Մովսիսյան | 0,5 |
Արտաշես Մինասյանն իրավունք ստացավ Հայաստանի շախմատի հավաքականի կազմում մասնակցել մայիսին Թուրինում կայանալիք օլիմպիադային: Սիրանուշ Անդրեասյանն էլ հանդես կգա կանանց հավաքականում: Բացի այդ, տղամարդկանց մրցաշարում 1-5-րդ տեղերը զբաղեցրած շախմատիստներն իրավունք ստացան մասնակցելու ապրիլի 1-ին մեկնարկող Եվրոպայի անհատական առաջնությանը:
ԱՇՈՏ ՀԱՅՐԱՊԵՏՅԱՆ