«ԱԶԳ» ՕՐԱԹԵՐԹ

ԴԱՆԻԵԼՅԱՆԸ ԶԻՋՈՒՄ Է ԱՌԱՋԱՏԱՐԻ ԴԻՐՔԵՐԸ

Մեկօրյա հանգստից հետո շախմատի Եվրոպայի անհատական առաջնության մասնակիցները կրկին նստեցին խաղասեղանների շուրջը` անցկացնելով 8-րդ տուրի հանդիպումները:

Տղամարդկանց մրցաշարում իր անպարտելի խաղերի շարքն է շարունակում Աշոտ Անաստասյանը: Նա չորրորդ անընդմեջ պարտիան ավարտեց ոչ-ոքի արդյունքով` խաղաղ դաշն կնքելով Ալեքսանդր Գրաֆի հետ: 8 տուրից հետո Անաստասյանը 5,5 միավորով ընթանում է 3-րդ տեղում: Նրանից ավելի շատ միավորներ են վաստակել միայն խորվաթ շախմատիստ Զդենկո Կոժուլը (6,5 միավոր) եւ ուկրաինացի Վասիլի Իվանչուկը (6): Կոժուլն այս տուրում սեւերով հաղթեց Պրեդրագ Նիկոլիչին, իսկ Իվանչուկը միավորը բաժանեց Կիրիլ Գեորգիեւի հետ մրցավեճում:

Աստիճանաբար առաջատարներին է մոտենում Արտաշես Մինասյանը, որը սեւերով հաղթելով Ալեքսանդր Ջեբուաձեին, նույնպես վաստակեց 5,5 միավոր: Նույնքան միավոր ունի նաեւ Վրաստանը ներկայացնող Դավիթ Հարությունյանը: Նա եւս Անաստասյանի նման առայժմ անպարտելի է: Դավիթը սեւերով ոչ-ոքի ավարտեց պարտիան Վլադիմիր Բելովի հետ:

4,5-ական միավոր ունեն Տիգրան Քոթանջյանն ու Տիգրան Պետրոսյանը: Վերջինս հաղթեց Քրիստիան Վայսին, իսկ ահա Քոթանջյանը զիջեց Սուաթ Ատալիկին: Հայ շախմատիստներից ամենացածր արդյունքն առայժմ ունի Արման Փաշիկյանը (3,5 միավոր), որը պարտվեց Կոնստանտին Սակաեւին:

Կանանց մրցաշարի 8-րդ տուրը հաջող էր հայ շախմատիստուհիներից երեքի համար: Մկրտչյանը, Աղինյանն ու Անդրեասյանը իրենց օգտին հաղթական միավորներ գրանցեցին` համապատասխանաբար պարտության մատնելով Յուրգենսին, Օզթուրկին եւ Կլինովային: Ցավոք անհաջող խաղաց Էլինա Դանիելյանը: Նա սպիտակներով պարտվեց Թեա Բոսբոմին: Էլինան զգալիորեն զիջեց առաջատարի իր դիրքերը` 5 միավորով նահանջելով 20-րդ հորիզոնական: Նույնքան միավոր ունի նաեւ Լիլիթ Մկրտչյանը: Նրանցից կեսական միավորով հետ են մնում Սիրանուշ Անդրեասյանն ու Նելլի Աղինյանը:

Կանանց մրցաշարի առաջատարներն են Թեա Բոսբոմը եւ Եկատերինա Ատալիկը, որոնք վաստակել են 6,5-ական միավոր: 6-ական միավոր ունեն Ելենա Դեմբոն ու Յոլանտա Զավադսկան:

ԱՇՈՏ ՀԱՅՐԱՊԵՏՅԱՆ