Ֆուտբոլի Հայաստանի գավաթի խաղարկությունը մոտենում է վերջնագծին: Եվս հինգ խաղ եւ հայտնի կդառնա պատվավոր մրցանակի նոր տերը: Հետաքրքրական է, որ 21-րդ դարում ՀՀ գավաթի խաղարկություններում առայժմ հաջողությունն ուղեկցել է միայն 2 թիմի` «Փյունիկին» ու «Միկային»: Չեմպիոնը հաջողության է հասել 2 անգամ (2002, 2004 թթ.), «Միկան»` 4 անգամ (2000, 2001, 2003, 2005 թթ.): Այս թիմերն ընթացիկ խաղարկությունում էլ հաջող են հանդես գալիս եւ բացառված չէ, որ նրանցից մեկը նվաճի գավաթը: Ընդ որում, մեծ է հավանականությունը, որ եզրափակիչում հանդիպեն «Փյունիկն» ու «Միկան»:
Սակայն եկեք իրադարձություններից առաջ չանցնենք: Այսօր կկայանան կիսաեզրափակիչ առաջին հանդիպումները: «Հանրապետական» մարզադաշտում «Փյունիկը» կհյուրընկալի «Բանանցին»: Հետաքրքրական է, որ գավաթի խաղարկություններում թիմերի ճանապարհներն արդեն 5-րդ անգամ են հատվում, ընդ որում երկու անգամ մրցակիցները հանդիպել են եզրափակիչում: Առաջին դեպքում, 1992 թ. հաջողությունն ուղեկցել է «Բանանցին», որը հաղթելով 2-0 հաշվով, նվաճել է գավաթը: Իսկ 2004 թ. վճռորոշ խաղում գավաթի բախտը վճռվեց միայն 11 մ հարվածաշարով (հիմնական ժամանակում հաշիվը չէր բացվել): Այստեղ բախտը ժպտաց «Փյունիկին», որը դարձավ գավաթակիր:
Ընդհանուր առմամբ, «Փյունիկն» ու «Բանանցը» գավաթի մրցաշարերում հանդիպել են 6 անգամ, թիմերից յուրաքանչյուրը 2-ական հաղթանակ է տոնել: Հետաքրքրական կլինի հետեւել նաեւ երկու թիմերի ռմբարկուներ Արսեն Ավետիսյանի եւ Արամ Հակոբյանի մրցավեճին: Արսենը գավաթի խաղերում 25 գոլ է խփել, Արամը` 24:
Կիսաեզրափակիչի մյուս հանդիպումը կկայանա այսօր, Ոսկեհատում, որտեղ «Միկան» կհյուրընկալի «Կիլիկիային»: Անշուշտ, մարզասերների հիշողությունում դեռեւս թարմ են գավաթի անցյալ տարվա եզրափակիչում նշված զույգի մրցավեճի մանրամասները: Այդ խաղում հաջողությունն ուղեկցեց «Միկային» (2-0): Նախ Կարեն Զաքարյանը գնդակն ուղարկեց սեփական դարպասը, ապա աչքի ընկավ «Միկայի» լեգեոնական Յուրի Մագդիեւը: Այդ հանդիպումը գավաթի մրցաշարերում առայժմ մրցակիցների միակ մրցավեճն էր: Թե ինչպիսի՞ ելք կունենա նոր մրցավեճը, հայտնի կդառնա ապրիլի 26-ին, երբ կանցկացվեն պատասխան հանդիպումները:
ԱՇՈՏ ՀԱՅՐԱՊԵՏՅԱՆ