Ֆուտբոլի Հայաստանի գավաթի կիսաեզրափակիչ պատասխան հանդիպումներից հետո հայտնի դարձան պատվավոր մրցանակի երկու գլխավոր հավակնորդները: Հատկապես դրամատիկ պայքար ծավալվեց «Բանանցի» եւ «Փյունիկի» մրցախաղում: Առաջին հանդիպումն ավարտվել էր «Փյունիկի» հաղթանակով (1-0): Պատասխան խաղում «Բանանցը» բավական ակտիվ խաղ ցուցադրեց եւ արդեն 31-րդ րոպեին Արամ Հակոբյանի խփած երկու գոլերի շնորհիվ խաղը շահում էր 2-0 հաշվով, ինչը ձեռնտու էր Նիկոլայ Կիսելյովի սաներին: 5 րոպե անց «Փյունիկը» հաշիվը կրճատելու հիանալի հնարավորություն ստացավ, սակայն Աղվան Մկրտչյանի 11 մ հարվածը հետ մղեց «Բանանցի» դարպասապահ Ռադաջան:
Թվում էր, թե այս անհաջողությունը թեւաթափ կանի փյունիկցիներին: Բայց ընդմիջումից հետո չեմպիոնը նոր թափ հաղորդեց գրոհներին: «Բանանցը» հիմնականում մտահոգված էր սեփական դարպասի պաշտպանությամբ, միեւնույն ժամանակ հարմար առիթ էր փնտրում վտանգավոր հակագրոհներ կազմակերպելու: Դրանցից մեկի ժամանակ էլ 81-րդ րոպեին «Բանանցի» ռմբարկու Արամ Հակոբյանը կարող էր հաղթական վերջակետ դնել հանդիպմանը` թիմին եզրափակիչի ուղեգիր պարգեւելով: Սակայն նա դուրս գալով հարվածային դիրք, չկարողացավ գրավել Կասպարովի պաշտպանած դարպասը: Եվ ինչպես հաճախ է պատահում ֆուտբոլում, հատուցումը չուշացավ: Աղվան Մկրտչյանը քավեց իր մեղքը եւ դիպուկ հարվածով գնդակն ուղարկեց դարպասը: 2-1 հաշիվը եզրափակիչի ուղեգիր էր ապահովում «Փյունիկին» ի հաշիվ մրցակցի դաշտում խփած միակ գոլի: «Փյունիկին» հաջողվեց պահպանել իրեն ձեռնտու հաշիվը եւ եզրափակիչի ուղեգիր նվաճել:
Կիսաեզրափակիչ մյուս խաղում «Միկան» կրկին հաղթեց «Կիլիկիային»` այս անգամ բավարարվելով ընդամենը մեկ գոլով (առաջին խաղում գրանցվել էր 3-0 հաշիվ): Միակ գոլը հանդիպման ավելացված ժամանակի առաջին րոպեին իր օգտին գրանցեց Տիգրան Դավթյանը:
ԱՇՈՏ ՀԱՅՐԱՊԵՏՅԱՆ