ՖԻՖԱ-ն հրապարակել է ազգային հավաքականների դասակարգման հերթական ցուցակը: Ապրիլ ամսվա համեմատ Հայաստանի հավաքականի դիրքը ցուցակում մնացել է անփոփոխ (109-րդ տեղ), իսկ ահա վարկանիշը նվազել է 5-ով (416):
Ֆուտբոլի Եվրոպայի 2008 թ. առաջնության ընտրական մրցաշարում Հայաստանի հավաքականի մրցակիցներից ամենաբարձր վարկանիշն ունեն պորտուգալացիները, որոնք մեկ հորիզոնականով բարձրացել են եւ զբաղեցնում են 7-րդ տեղը: Հաջորդը լեհերն են (29-րդ տեղ), որոնք մեկ հորիզոնականով նահանջել են: Սերբիայի ընտրանին 2 տեղով վեր է բարձրացել (44-րդ տեղ), իսկ ահա ֆինները (49-րդ տեղ), բելգիացիները (56-րդ տեղ) եւ ադրբեջանցիները (112-րդ տեղ) պահպանել են դիրքերը: Մեկ հորիզոնականով առաջընթաց է ունեցել Ղազախստանի հավաքականը (135-րդ տեղ):
Ընդհանրապես նախորդ ամսվա համեմատ ցուցակում փոփոխություններն աննշան են: Առավել մեծ տեղաշարժ են կատարել Միացյալ Էմիրությունների եւ Հասարակածային Գվինեայի հավաքականները, որոնք 7 հորիզոնականով բարձրացել են: Իր դիրքերը պահպանել է լավագույն տասնյակը, որում 2 հորիզոնականով առաջադիմել են մեքսիկացիները:
Ներկայացնում ենք դասակարգման ցուցակի լավագույն տասնյակի եւ նախկին ԽՍՀՄ հանրապետությունների հավաքականների ցուցանիշները:
| 1. Բրազիլիա | 827 |
| 2. Չեխիա | 772 |
| 3. Հոլանդիա | 768 |
| 4. Մեքսիկա | 758 |
| 5. ԱՄՆ | 756 |
| 6. Իսպանիա | 756 |
| 7. Պորտուգալիա | 750 |
| 8. Ֆրանսիա | 749 |
| 9. Արգենտինա | 746 |
| 10. Անգլիա | 741 |
| 37. Ռուսաստան | 645 |
| 45. Ուկրաինա | 609 |
| 60. Ուզբեկստան | 571 |
| 65. Բելառուս | 553 |
| 70. Լատվիա | 541 |
| 77. Էստոնիա | 534 |
| 93. Լիտվա | 481 |
| 101. Վրաստան | 459 |
| 104. Մոլդովա | 452 |
| 109. Հայաստան | 416 |
| 112. Ադրբեջան | 392 |
| 120. Թուրքմենստան | 371 |
| 121. Տաջիկստան | 369 |
| 135. Ղազախստան | 319 |
| 147. Ղրղզստան | 273 |
ԱՇՈՏ ՀԱՅՐԱՊԵՏՅԱՆ