Ֆուտբոլի աշխարհի առաջնությանը զուգահեռ շարունակվում են Հայաստանի առաջնության հանդիպումները: Առանց այն էլ Հայաստանի առաջնության հանդիպումների նկատմամբ հետաքրքրասիրությունը ցածր է: Իսկ այս օրերին ֆուտբոլասերներից շատերը նախընտրում են մնալ տանը եւ հեռուստացույցով հետեւել աշխարհի առաջնության հանդիպումներին, ուստի Հայաստանի առաջնության խաղերն անցնում են գրեթե դատարկ տրիբունաների առաջ:
Վերջին շրջանում կրկին վստահ ելույթներ է ունենում Երեւանի «Արարատը»: Գլխավոր մարզչի պաշտոնում Սուրեն Բարսեղյանին փոխարինած Աբրահամ Խաշմանյանի գլխավորությամբ արարատցիները 3-րդ անընդմեջ հաղթանակը տոնեցին: «Գանձասարի» հետ հանդիպումը սկզբունքային նշանակություն ուներ «Արարատի» համար: Հաջողության դեպքում արարատցիները կամրապնդվեին աղյուսակի 4-րդ հորիզոնականում եւ լավ նախադրյալներ կունենային առաջատարների խմբում կրկին ընդգրկվելու համար: Կար մեկ այլ հանգամանք եւս, որն ստիպում էր «Արարատին» ձգտելու ամեն կերպ հաղթել «Գանձասարին»: Բանն այն է, որ առաջին շրջանում Կապանում «Գանձասարը» հաղթել էր 2-1 հաշվովՙ հաղթանակը կորզելով վերջին րոպեին: Բնականաբար, արարատցիները ձգտելու էին ռեւանշի: Եվ դա նրանց հաջողվեց: «Արարատը» վստահ անցկացրեց խաղը, թեեւ առաջինը հաջողության էր հասել «Գանձասարը»: (17-րդ րոպեին աչքի էր ընկել հյուրերի հարձակվող Սամվել Պետրոսյանը): Արարատցիների կազմում դիպուկ հարվածներով աչքի ընկան բրազիլացիներ Մարկոսն ու Ռենատոն, ինչպես նաեւ թիմի ռմբարկու Էդգար Սաֆարյանըՙ խփելով առաջնությունում 7-րդ գնդակը: «Արարատը» հաղթեց 3-1 հաշվով եւ ամրապնդվեց 4-րդ հորիզոնականում:
Գյումրիում մրցեցին առաջնության հետնապահներ «Շիրակն» ու «Ուլիսը»: Հանդիպման ելքը վճռեց խաղավերջում ուլիսցի Արթուր Աղասյանի խփած միակ գոլը: Մեծ հետաքրքրությամբ էր սպասվում առաջնության առաջատարներ «Միկայի» եւ «Բանանցի մրցավեճը: Համառ մրցակցություն ծավալվեց առաջատարների խաղում: Առաջին խաղակեսում «Միկայի» հարձակվող Արմեն Շահգելդյանին հաջողվեց բացել հաշիվը: Ինչպես պարզվեց հետագայում, դա այդ հանդիպման միակ գոլն էր, որը կարեւոր հաղթանակ պարգեւեց «Միկային»:
Հունիսի 24-ին Թբիլիսիում տեղի «Դինամոյի» հետ Ինտերտոտոյի գավաթի խաղարկության պատասխան հանդիպումից առաջ «Կիլիկիան» ուժերը փորձարկեց երկրի չեմպիոն «Փյունիկի» հետ: Արդեն առաջին խաղակեսում փյունիկցիները փաստորեն վճռեցին հանդիպման ելքը` երեք անպատասխան գնդակ ուղարկելով մրցակցի դարպասը: Դիպուկությամբ աչքի ընկան Ալեքսանդր Պետրոսյանը, Աղվան Մկրտչյանը եւ Արսեն Ավետիսյանը: Երկրորդ խաղակեսից քիչ անց Ալեքսանդր Պետրոսյանը չորրորդ անգամ ստիպեց հյուրերին խաղը վերսկսել դաշտի կենտրոնից: Հետագայում էլ փյունիկցիները ունեցան դարպասը գրավելու հիանալի պահեր, սակայն չօգտագործեցին: Փոխարենը նրանք խաղավերջում կորցրին զգոնությունը` մրցակցին հնարավորություն ընձեռելով 2 անգամ գրավել դարպասը: «Կիլիկիայից» գոլերի հեղինակ դարձան Սարգիս Մովսիսյանն ու Նշան Էրզրումյանը:
Մրցաշարային աղյուսակ
| Խ | Հ | Ո | Պ | Գ | Մ | |
| 1. Փյունիկ | 11 | 10 | 1 | 0 | 37-8 | 31 |
| 2. Միկա | 11 | 7 | 1 | 3 | 18-10 | 22 |
| 3. Բանանց | 11 | 6 | 1 | 4 | 24-12 | 19 |
| 4. Արարատ | 11 | 5 | 2 | 4 | 15-18 | 17 |
| 5. Գանձասար | 11 | 3 | 2 | 6 | 8-18 | 11 |
| 6. Կիլիկիա | 10 | 2 | 3 | 5 | 15-21 | 9 |
| 7. Շիրակ | 10 | 1 | 4 | 5 | 6-28 | 7 |
| 8. Ուլիս | 11 | 2 | 0 | 9 | 11-19 | 6 |
Ռմբարկուները
| Արամ Հակոբյան | «Բանանց» | 8 |
| Արսեն Ավետիսյան | «Փյունիկ» | 8 |
| Արմեն Շահգելդյան | «Միկա» | 8 |
| Էդգար Սաֆարյան | «Արարատ» | 7 |
ԱՇՈՏ ՀԱՅՐԱՊԵՏՅԱՆ