Կանադական «Տրանսեվրոէներջի կորպորեյշն» ընկերությունը 2006 թ. կսկսի Արմավիրում, Կարմիրում եւ Շողաղբյուրում նավթի եւ գազի որոնման հետախուզական աշխատանքները: «Ազատություն» ռադիոկայանի մեջբերմամբ, ընկերության հայկական գրասենյակի ղեկավար Մայք Սմիթը համոզմունք է հայտնել, որ Հայաստանի ընդերքում կան գազի եւ նավթի պաշարներ:
Հայաստանում գազի եւ նավթի առկայության ընդհանուր տրամաբանությունն այն է, որ չորս կողմում նավթի գոյությունը բացառում է Հայաստանում պաշարների բացակայությունը: Ըստ Մայք Սմիթի, նախկինում այս ուղղությամբ հետազոտությունները կոմերցիոն նպատակներ չեն հետապնդել, մինչդեռ կանադական ընկերությունը պատրաստ է ներդնել անհրաժեշտ տեխնիկա եւ ստանալ իրեն հետաքրքրող հարցերի պատասխանները: Արդեն իսկ պայմանավորվածություն է ձեռք բերվել համապատասխան տեխնիկա Հայաստան բերելու կապակցությամբ, որը հնարավորություն է տալիս ընդերքը հետազոտել մինչեւ 2500 մետր խորությամբՙ նվազագույն վնաս հասցնելով շրջապատին:
Ամեն դեպքում սեպտեմբերին սկսվող աշխատանքների արդյունքներին կարելի է սպասել 2007 թ. փետրվարին:
Ա. Հ.