Ինչպես արդեն տեղեկացրել ենք, համաշխարհային թենիսի կենդանի լեգենդ, 36-ամյա Անդրե Աղասին վճռել է ավարտել ելույթները: Ուիմբլդոնյան մրցաշարում Աղասին հանդես է գալիս արդեն 14-րդ եւ վերջին անգամ: Այս առնչությամբ Աղասին մամուլի ասուլիս է հրավիրել, որը ներկայացնում ենք ընթերցողների ուշադրությանը:
- Ես վերջին անգամ եմ Ուիմբլդոնի կորտերը դուրս գալու, իսկ թենիսի ԱՄՆ-ի բաց առաջնությունը կդառնա իմ մարզական կենսագրության վերջին մրցաշարը:
- Ինչպե՞ս վճիռ ընդունեցիք:
- Նույն ձեւով, ինչպես որոշեցի ամուսնանալ, ընտանիք կազմել, նույն ալգորիթմն է:
- Իսկ կոնկրետ ե՞րբ որոշեցիք հեռանալ թենիսից:
- Մի քանի ամիս առաջ, սակայն ելույթներս ավարտելու մասին հայտարարությունը հետաձգում էի, որպեսզի այդ մասին հայտնեմ այստեղ, քանի որ Ուիմբլդոնում եմ առաջին անգամ հաղթող ճանաչվել «Մեծ սաղավարտի» մրցաշարում:
- Ինչո՞վ էիք առաջնորդվում որոշում կայացնելիս:
- Հավատացեք, գործոնները բազմաթիվ էին: Արդեն 20 տարուց ավելի հանդես եմ գալիս թենիսի կորտերում եւ սովոր եմ ինձ զգալ ֆիզիկապես եւ հոգեպես պատրաստ մրցումներին: Իսկ այժմ զգում եմ, որ եկել է հրաժեշտի պահը:
- Ընտանիքի հետ խորհրդակցե՞լ եք:
- Իհարկե, մերձավորներս համամիտ էին այդ հարցում:
- Հասցրե՞լ եք մեծ հարստություն կուտակել:
- Հույս ունեմ այդ մասին շուտով կկարդաք լրատվամիջոցներում (ծիծաղում է):
- Ի՞նչ եք կարծում, մարզական գործունեությունն ավարտելուց հետո ամենից շատ ինչի՞ց կզրկվեք:
- Առաջին հերթին մարդկանց հետ շփվելուց: Չէ՞ որ պրոֆեսիոնալ թենիսում անցկացրած տարիների ընթացքում մեծ թվով բարեկամներ եմ ձեռք բերել:
- Խոստովանեք, տխո՞ւր եք:
- (Ծիծաղում է): Ոչ մի դեպքում: 14 տարի առաջ հաղթող ճանաչվելով Ուիմբլդոնում, չէի կարող պատկերացնել, թե թենիսից հեռանալու որոշումը կհայտնեմ այսօր:
- Ընթացիկ մրցաշարում լուրջ խնդիրներ դնելո՞ւ եք ձեր առջեւ:
- Պատրաստ եմ մրցաշարին եւ եթե հաջողվի մի քանի փուլ հաղթահարել, կփորձեմ հիմնախնդիրներ ստեղծել ուժեղագույն թենիսիստների համար:
- Դուք հատուկ նախապատրաստվե՞լ եք ուիմբլդոնյան ձեր վերջին մրցաշարին:
- Բավական հիմնավոր: Գնահատելով մարզավիճակս, բաց թողեցի Ֆրանսիայի բաց առաջնությունը, որպեսզի Ուիմբլդոնը դիմավորեմ լրիվ պատրաստ վիճակում: Բանն այն է, որ վերջին տարիներին չեմ կարողանում հողածածկույթով կորտերում ելույթից հետո շուտ վերականգնվել:
- Ուիմբլդոնից հետո մինչեւ ԱՄՆ-ի բաց առաջնության մեկնարկը մտադի՞ր եք մասնակցել մրցումների:
- Այո, կարծում եմ երեք-չորս մրցաշարի կմասնակցեմ: Սակայն իմ գլխավոր նպատակը ԱՄՆ-ի բաց առաջնությունը լավ մարզավիճակում դիմավորելն է: Կձգտեմ, որպեսզի հրաժեշտի մրցաշարը հնարավորինս հաջող ավարտվի ինձ համար:
Վերջում ներկայացնենք Անդրե Աղասու մասին նրա գործընկերներից ոմանց կարծիքը:
Ռոջեր Ֆեդեռեր - Մենք հրաժեշտ ենք տալիս թենիսի լեգենդին եւ դրանում հաճելի ոչինչ չկա: Ես խորապես հարգում եմ Աղասուն: Նա հռչակավոր թենիսիստ է: Երջանիկ եմ, որ ինձ բախտ է վիճակվել նրա հետ մրցել կորտում: Գուցե այստեղ կամ էլ ԱՄՆ-ի բաց առաջնությունում դեռեւս հարկ լինի հանդիպել Աղասու հետ:
Ռաֆայել Նադալ - Չեմ հիշում, թե 1992 թ. Աղասին ինչպես է հաղթել Ուիմբլդոնում: Այն ժամանակ 6 տարեկան էի: Սակայն ականատես եմ եղել ԱՄՆ-ի բաց առաջնություններում նրա եւ Փիթ Սամփրասի եզրափակիչ մի քանի մրցախաղերին: Անդրեն յուրօրինակ մարզիկ է, որին հաջողվեց կրկին նախկին բարձր խաղամակարդակը ձեռք բերել այն բանից հետո, երբ գործնականում արդեն դադարել էր խաղալ: Դա կրկնել գործնականում անհնար է:
Լլեյրոն Հյուիթ - Չէի ասի, թե զարմացած եմ Աղասու վճռից: Վաղ թե ուշ դա պետք է տեղի ունենար: Աղասուն մեծապես հարգում եմ: Եվ ոչ միայն նրա տպավորիչ արդյունքների համար: Կորտում եւ դրանից դուրս Աղասու պահվածքն արժանի է ընդօրինակման: Թենիսում փոքրաթիվ է այն թենիսիստների թիվը, որոնք հանրահայտ են ողջ աշխարհում: Պատանի տարիքում Աղասին կուռքս էր: Հետեւելով նրա հաղթական մրցելույթներին, ինքս վստահություն էի ձեռք բերում:
Վինուս Ուիլյամս - Աղասին հռչակավոր չեմպիոն է, որը մշտապես գործել է այնպես, ինչպես ինքն է հարկ համարելՙ անկախ հասարակական կարծիքից: Նա ոչ միայն հիացրել է կորտում իր խաղային հնարքներով, այլեւ հռչակավոր անձնավորություն է:
Մարիա Շարապովա - Նա այն մարդկանցից է, որոնց մասին դժվար է որեւէ վատ բան ասել: Հաղթելով կամ պարտվելով, նա միշտ էլ իսկական չեմպիոն է եղել, որի ավանդը թենիսում անուրանալի է:
ԱՇՈՏ ՀԱՅՐԱՊԵՏՅԱՆ