Չորս հանդիպումներով ավարտվեց ֆուտբոլի Հայաստանի բարձրագույն խմբի առաջնության երկրորդ շրջանը: Եվրոգավաթների շեմին իրենց վերջին փորձամրցումները հաջող անցկացրին «Փյունիկը», «Միկան» եւ «Բանանցը»ՙ տոնելով հերթական հաղթանակները: Երկրի չեմպիոնը սեփական հարկի տակ 2-1 հաշվով հաղթեց «Շիրակին»: Փյունիկցիներից երկու գոլի հեղինակ դարձավ Ալեքսանդր Պետրոսյանը, իսկ «Շիրակից» գոլն իր օգտին գրանցեց Վլադիմիր Գասպարյանը:
Հետաքրքրական մրցապայքարում անցավ «Արարատի» եւ «Միկայի» մրցավեճը: Դաշտում հիմնականում հավասար պայքար էր ընթանում: Երկու թիմերն էլ ունեցան դարպասները գրավելու լավ հնարավորություններ: Ավելի հաջողակ գտնվեց «Միկան»: Հանդիպման 53-րդ րոպեին «Արարատի» դարպասում անսովոր գոլ գրանցվեց: «Միկայի» հարձակվող Արտյոմ Ադամյանը հեռահար հարվածով գնդակն ուղարկեց մրցակցի տուգանային հրապարակ, որտեղ դարպասապահ Երիցյանը սխալ դուրս եկավ դարպասից, իսկ պաշտպանները փորձելով գնդակը հեռացնելՙ անփույթ խաղացին եւ Եփրեմյանն այն ուղարկեց սեփական դարպասը: Բաց թողած գոլից հետո արարատցիները զգալիորեն ակտիվացրին հարձակողական գործողությունները, սակայն այդպես էլ չկարողացան լրջորեն սպառնալ «Միկայի» դարպասին: Իսկ ահա «Միկայի» ֆուտբոլիստները խաղավերջում եւս մեկ անգամ հասան հաջողության: Արագ հակագրոհի շնորհիվ Արմեն Շահգելդյանը ներխուժեց տուգանային հրապարակ եւ նրա հետ պայքարում «Արարատի» պաշտպան Գեղամ Քոչարյանը վայր գցեց: Շահգելդյանն ինքն էլ դիպուկ հարվածով իրացրեց 11 մՙ 2-0 հաշվով հաղթանակ պարգեւելով «Միկային»:
Վերջին հանդիպումներում արդյունավետ խաղ է ցուցադրում «Բանանցը»: Առաջնության հետնապահ «Ուլիսի» հետ խաղում «Բանանցի» ֆուտբոլիստները չորս անպատասխան գնդակ խփեցին, որոնցից երկուսն իր օգտին գրանցեց առաջնության լավագույն ռմբարկու Արամ Հակոբյանը: Իսկ հաշիվը 15-րդ րոպեին բացել էր «Ուլիսի» խաղացող Ալբերտ Ներսիսյանըՙ դառնալով ինքնագոլի հեղինակ: Մինչեւ ընդմիջում Սիզիխինը կրկնապատկել էր հաշիվը:
Չորս անընդմեջ պարտություններից հետո վերջապես իր երկրպագուներին ուրախացրեց «Գանձասարը»ՙ Կապանում 4-2 հաշվով առավելության հասնելով «Կիլիկիայի» նկատմամբ: Իրենց օգտին երկուական գոլ գրանցեցին «Կիլիկիայի» հարձակվող Սարգիս Մովսիսյանը եւ «Գանձասարի» ռմբարկու Արթուր Քոչարյանը: Մյուս երկու գոլերը «Գանձասարից» խփեցին Թբիլաշվիլին եւ Վիլեն Հարությունյանը:
Մրցաշարային աղյուսակ
| Խ | Հ | Ո | Պ | Գ | Մ | |
| 1. Փյունիկ | 14 | 13 | 1 | 0 | 43-10 | 40 |
| 2. Միկա | 14 | 9 | 2 | 3 | 23-12 | 29 |
| 3. Բանանց | 14 | 9 | 1 | 4 | 36-13 | 28 |
| 4. Արարատ | 14 | 5 | 3 | 6 | 16-22 | 18 |
| 5. Գանձասար | 14 | 4 | 2 | 8 | 14-29 | 14 |
| 6. Շիրակ | 13 | 2 | 5 | 6 | 10-32 | 11 |
| 7. Կիլիկիա | 13 | 2 | 3 | 8 | 18-28 | 9 |
| 8. Ուլիս | 14 | 2 | 1 | 11 | 13-27 | 7 |
Ռմբարկուները
| Արամ Հակոբյան | «Բանանց» | 14 |
| Արմեն Շահգելդյան | «Միկա» | 10 |
| Արսեն Ավետիսյան | «Փյունիկ» | 8 |
| Էդգար Սաֆարյան | «Արարատ» | 7 |
| Լեւոն Փաչաջյան | «Փյունիկ» | 7 |
| Արթուր Քոչարյան | «Գանձասար» | 6 |
ԱՇՈՏ ՀԱՅՐԱՊԵՏՅԱՆ