Մեկամսյա ընդմիջումից հետո վերսկսվեց ֆուտբոլի Հայաստանի բարձրագույն խմբի առաջնությունը: 3-րդ շրջանի մեկնարկային տուրում առավել մեծ հետաքրքրություն էր ներկայացնում Երեւանի «Արարատի» եւ «Բանանցի» մրցավեճը: Դա նախ պայմանավորված էր նրանով, որ մրցակիցները մրցաշարային աղյուսակում հարեւաններ էին եւ հանդիպման ելքը կարեւոր նշանակություն ուներ մրցանակային տեղերի համար մղվող պայքարում: Եվ երկրորդը, «Արարատի» ղեկը ստանձնել էր Վարուժան Սուքիասյանը, թիմի կազմը համալրել էին Էրզրումյան եղբայրները եւ հետաքրքրական էր, թե ինչպիսին կլիներ նրանց նորամուտը նոր կոլեկտիվում: Առաջ անցնելով նշենք, որ նորամուտը հաջողվեց: «Արարատը» խոշոր հաշվով (3-0) վստահ հաղթանակ տոնեց, իսկ Նշան Էրզրումյանն իր նորամուտը նշեց խփած 2 գոլերով: Վարուժան Սուքիասյանի համար էլ հաղթանակը հիշարժան էր նրանով, որ իր սաները 50-ամյա հոբելյանի առթիվ հիանալի նվեր մատուցեցին մարզչին:
Խաղը շատ հաջող սկսվեց արարատցիների համար, որոնք արդեն 2-րդ րոպեին բացեցին հաշիվը: Աչքի ընկավ բրազիլացի Ռենատո դե Մորայեսնՙ անկյունայինի խաղարկումից հետո գրավելով Ռադաջայի պաշտպանած դարպասը: Արարատցիները խաղը կառուցել էին հակագրոհների վրաՙ առջեւի գծում թողնելով միայն բրազիլացի Մարկոսին: Իսկ ահա «Բանանցը» բավական ակտիվ հարձակողական գործողություններ էր ծավալել: Թիմի կազմում իր ակտիվությամբ աչքի էր ընկնում Վահե Թադեւոսյանը, որը մշտապես շարժման մեջ էր եւ դարպասը գրավելու ուղիներ էր փնտրում: Նա մի քանի անգամ հայտնվեց կրակագծում, սակայն նպաստավոր դիրքերից վրիպեց: Ընդմիջումից քիչ անց կոպիտ խաղի համար դաշտից հեռացվեց «Բանանցի» ֆուտբոլիստ Սուրեն Սարգսյանը: Թեեւ 10 հոգով, սակայն «Բանանցը» ձգտում էր փրկել խաղը: Եվ այստեղ ժամանակին «Արարատի» մարզիչները խաղադաշտ մտցրին Նշան Էրզրումյանին, որը պարզապես փայլեց իր անհատական վարպետությամբ ու գոլ խփելու հիանալի ունակությամբ: Երկու անգամ Մարկոսը նուրբ ու ճշգրիտ փոխանցումներով Նշանին հարվածային դիրք դուրս բերեց եւ «Արարատի» նորեկը ձեռքից բաց չթողեց գոլ խփելու հնարավորությունըՙ վերջնականապես վճռելով հանդիպման ելքը:
Մրցանակային տեղի հավակնորդ «Միկան» էլ շատերի համար անսպասելի չկարողացավ Գյումրիում հաղթել «Շիրակին» (0-0) եւ 2 կարեւոր միավոր կորցրեց: Հետաքրքրական է, որ առաջնության մեկնարկային խաղում էլՙ Գյումրիում «Շիրակի» ու «Միկայի» մրցավեճն ավարտվել էր 0-0 հաշվով:
Իսկ ահա երկրի չեմպիոն «Փյունիկը» հերթական խոշոր հաշվով հաղթանակը տոնեց: Արդեն առաջին խաղակեսում Աղվան Մկրտչյանը, Ռոբերտ Արզումանյանն ու Արսեն Ավետիսյանը 3 անգամ գրավեցին «Գանձասարի» դարպասը, որին մրցակիցը պատասխանեց Արմեն Պետրոսյանի գոլով: Ընդմիջումից հետո «Փյունիկը» խաղադաշտ դուրս բերեց երիտասարդ մի քանի ֆուտբոլիստների եւ եւս երկու գոլ խփեց: Աչքի ընկան Գեւորգ Ղազարյանն ու Բորիս Մելքոնյանը: Հաղթելով 5-1 հաշվով, «Փյունիկն» ավելի ամրապնդեց առաջատարի դիրքը:
Գոլառատ էր նաեւ «Ուլիս»-«Կիլիկիա» մրցախաղը: Երկու թիմերում էլ կազմի զգալի փոփոխություններ են կատարվել: Առաջին խաղակեսում շնորհիվ Կարեն Նավոյանի խփած միակ գոլի, «Ուլիսը» հաշվի մեջ առջեւում էր: Սակայն 2-րդ խաղակեսում Գառնիկ Ղասաբյանն ու Սարգիս Մովսիսյանն առաջ մղեցին «Կիլիկիային»: Ճիշտ է, Նիկոլայ Աղասյանը շուտով վերականգնեց հավասարակշռությունը, սակայն խաղավարտից չորս րոպե առաջ Լեւոն Ղասաբօղլյանը խփեց հաղթական գնդակըՙ 3 միավոր պարգեւելով «Կիլիկիային»: Այդ հաղթանակի շնորհիվ «Կիլիկիան» շրջանցեց «Գանձասարին»:
Մրցաշարային աղյուսակ
| Խ | Հ | Ո | Պ | Գ | Մ | |
| 1. Փյունիկ | 15 | 14 | 1 | 0 | 48-11 | 43 |
| 2. Միկա | 15 | 9 | 3 | 3 | 23-12 | 30 |
| 3. Բանանց | 15 | 9 | 1 | 5 | 36-16 | 28 |
| 4. Արարատ | 15 | 6 | 3 | 6 | 19-22 | 21 |
| 5. Կիլիկիա | 15 | 4 | 3 | 8 | 22-30 | 15 |
| 6. Գանձասար | 15 | 4 | 2 | 9 | 15-34 | 14 |
| 7. Շիրակ | 15 | 2 | 6 | 7 | 10-33 | 12 |
| 8. Ուլիս | 15 | 2 | 1 | 12 | 15-30 | 7 |
Ռմբարկուները
| Արամ Հակոբյան | «Բանանց» | 14 |
| Արմեն Շահգելդյան | «Միկա» | 10 |
| Արսեն Ավետիսյան | «Փյունիկ» | 9 |
| Նշան Էրզրումյան | «Արարատ» | 7 |
| Էդգար Սաֆարյան | «Արարատ» | 7 |
| Լեւոն Փաչաջյան | «Փյունիկ» | 7 |
| Սարգիս Մովսիսյան | «Կիլիկիա» | 7 |
ԱՇՈՏ ՀԱՅՐԱՊԵՏՅԱՆ