Բաքու-Թբիլիսի-Ջեյհան նավթամուղի խողովակներին սպառնում է կոռոզիա, ինչն իր հերթին կարող է բերել Էկոլոգիական աղետի Վրաստանում, Ադրբեջանում եւ Թուրքիայում: ԻՏԱՌ-ՏԱՍՍ-ի հաղորդմամբ, նման հայտարարություն է արել «Պլատֆորմ» միջազգային էկոլոգիական կազմակերպությունը: «Պլատֆորմ»-ը նման զգուշացում է արել, երբ խողովակաշարի շինարարությունը գլխավորող բրիտանական «British Petroleum»-ը ստիպված դադարեցրել է Ալյասկայում իր հանքավայրերում նավթի արդյունահանումը` BP-ի ղեկավարած անդրալյասկյան նավթամուղի արագ կոռոզիայի պատճառով: «British Petroleum»-ի աշխատակից Միկո Մինյո Պաուելլոյի խոսքերով, BP-ն Կովկասում շինարարությունն իրականացնելիս պակաս մտահոգ էր էկոլոգիական անվտանգությամբ, քան Ալյասկայում:
Միեւնույն ժամանակ, «BP-Georgia» ընկերությունում ժխտել են «Պլատֆորմ» միջազգային էկոլոգիական կազմակերպության հայտարարությունը: Ըստ «BP-Georgia»-ի, ընկերությունը մշտապես դիտարկում է անցկացնում ինչպես նավթի բաղադրության, այնպես էլ Բաքու-Թբիլիսի-Ջեյհան նավթատարի վիճակի առնչությամբ:
Ա. Հ.