Երեկ Ֆրանսիայում ԵԱՀԿ Մինսկի խմբի համանախագահների հետ հանդիպմանն արտգործնախարար Վարդան Օսկանյանը քննարկել է Ղարաբաղի հակամարտության կարգավորման բանակցությունների ներկա փուլին վերաբերող երեք մակարդակի հարցեր: Զրուցակիցները, արտգործնախարարության մամուլի հաղորդագրության համաձայն, հստակեցրել են բանակցությունների սեղանին դրված փաստաթղթի խնդրահարույց կետերը, ուսումնասիրելով դրանց շրջանցման հնարավորությունը:
Հատուկ ուշադրություն է դարձվել բուն բանակցություններից դուրս այն խոչընդոտներին, այլ ատյաններում առաջ քաշվող այն նախաձեռնություններին, որոնք շեղում են բանակցություններում ներգրավված կողմերի ջանքերը խաղաղ գործընթացից: ԵԱՀԿ Մինսկի խմբի համանախագահներն ու Վարդան Օսկանյանը քննարկել են նաեւ Հայաստանի ու Ադրբեջանի արտգործնախարարների հանդիպման հնարավորությունը:
Նշենք, որ ադրբեջանական լրատվամիջոցներն արդեն երեկ ապատեղեկատվություն են տարածել, թե Օսկանյանը հրաժարվել է Մամեդյարովի հետ հանդիպումիցՙ պատճառաբանելով ՄԱԿ-ում ադրբեջանական նախաձեռնությամբ անցկացված հրդեհների բանաձեւը:
Ա. Հ.