Ֆուտբոլի Հայաստանի ազգային հավաքականն անփառունակ ելույթ ունեցավ ընտրական մրցաշարի 3-րդ խաղում` Բելգրադում խաղային բոլոր առումներով զիջելով «A» խմբի առաջատար Սերբիայի ընտրանուն: Հարցը միայն 0-3 խոշոր հաշվով կրած պարտությունը չէ, այլ այն պարզունակ եւ «անատամ» խաղը, որ ցուցադրեցին մեր ֆուտբոլիստները մրցակցի դաշտում: Եթե բելգիացիների եւ ֆինների հետ ընտրական հանդիպումներում մեր ֆուտբոլիստները գոնե պայքարելու կամք ու վճռականություն հանդես բերեցին, ինչը չամրապնդվեց վարպետությամբ, ապա սերբերի հետ խաղում դա էլ չդրսեւորվեց: Հերթական անգամ մեր ֆուտբոլիստները խաղադաշտը թողեցին առանց գոլ խփելու: Իսկ ինչպես կարելի է գոլ խփել առանց դարպասին հարվածելու: Ողջ խաղի ընթացքում դարպասի ուղղությամբ ընդամենը երկու հարված հասցրեցին մեր ֆուտբոլիստները: Դրանցից առաջինը 4-րդ րոպեին տուգանային հարվածով կատարեց Շահգելդյանը, որը մի փոքր բարձր ստացվեց, իսկ խաղավերջում էլ գնդակի ճանապարհը փակեց դաշտի տերերի պաշտպանը: Նման պայմաններում, իհարկե, գոլ խփելն անհնար է:
Նշենք, որ սերբերը գրեթե ողջ հանդիպումն անցկացնելով մեր կիսադաշտում, միայն 3 գոլ խփեցին: Ճիշտ է, հաշիվն ավելի խոշոր կլիներ, եթե այս խաղում էլ իրեն հիանալի չդրսեւորեր դարպասապահ Գեւորգ Կասպարովը: Միայն մի քանի անգամ նա կարողացավ հետ մղել սերբերի առաջատար Նիկոլա Ժիգիչի վտանգավոր հարվածները: Վերջինիս մեր պաշտպանները այդպես էլ չկարողացան վնասազերծել: Մի շարք դրվագներում էլ սերբերն էին գրոհների եզրափակիչ փուլում անփույթ գործում` դրանով նպաստելով մեր դարպասի անառիկ մնալուն: Հիմնականում դրանով կարելի է բացատրել այն փաստը, որ առաջին խաղակեսում հաջողվեց դարպասը պահել անառիկ: Սերբերն առաջին խաղակեսում նույնիսկ 11 մ հարվածը չիրացրին. Պանտելիչը անփույթ գտնվեց` բարձր հարված կատարելով:
Եթե առաջին խաղակեսում մեր ֆուտբոլիստներին որոշ չափով հաջողվեց դիմագրավել մրցակցի գրոհներին, ապա ընդմիջումից հետո նրանք չդիմացան սերբերի ճնշմանը: Պաշտպանները սկսեցին աններելի սխալներ թույլ տալ, որի հետեւանքով էլ գնդակը երեք անգամ հայտնվեց մեր դարպասում: 50-րդ րոպեին Ժիգիչին հսկողությունից դուրս էին թողել եւ Կասպարովը ստիպված էր վայր գցել նրան: Ստանկովիչը հստակ իրացրեց 11 մ հարվածը: Հետագայում էլ սերբերը դասական երկու կոմբինացիայի արդյունքում հասան հաջողության: Ձախ թեւից փոխանցումները գլխի դիպուկ հարվածներով եզրափակեցին Դանկո Լազովիչն ու Նիկոլա Ժիգիչը: Ընդ որում առաջին դրվագում Կարեն Դոխոյանը չկարողացավ վնասազերծել մրցակցին, երկրորդ դեպքում ուշացավ Եղիշե Մելիքյանը:
Նշենք, որ 2-րդ գոլից հետո սերբերը փաստորեն դադարեցրին ակտիվ խաղը: Նույնիսկ նման պայմաններում հայ ֆուտբոլիստները չկարողացան որեւէ մտածված կոմբինացիա ձեռնարկել, քիչ թե շատ վտանգավոր պահ ստեղծել մրցակցի դարպասին: Մեր ֆուտբոլիստների մոտ կառուցողական խաղն իսպառ բացակայում էր, մեկ-երկու փոխանցումներից հետո գնդակը հայտնվում էր մրցակցի մոտ: Չկար մեկը, որ կարողանար որեւէ կերպ կազմակերպել խաղընկերների գործողությունները: Հայաստանի հավաքականը թույլ ու անօգնական թիմի տպավորություն թողեց, շատ դժգույն ելույթ ունեցավ եւ օրինաչափ պարտություն կրեց:
Այսպիսով, 3 տուրից հետո մեր ընտրանին ադրբեջանցիների հետ եզրափակում է «A» խմբի աղյուսակը: Արդեն պարզ է, որ մեր հավաքականը ձախողել է ընտրական հերթական մրցաշարը: Նոր գլխավոր մարզիչ Իան Պորտերֆիլդին էլ չի հաջողվում փոխել հավաքականի խաղաոճը, խաղային ձեռագիր ստեղծել: Ակամայից հիշում ես Միխայ Ստոյկիցայի ժամանակ հավաքականի հանդիպումները: Մեր ընտրանին խոշոր հաշվով պարտվեց իսպանացիներին, բայց իր լավագույն խաղերից մեկը ցուցադրեց: Իսկ սերբերի հետ մրցախաղը կարելի է դասել մեր հավաքականի ամենադժգույն ու անհաջող խաղերի շարքը: Այսպես շարունակել այլեւս չի կարելի: Անհրաժեշտ են կտրուկ միջոցներ` վիճակը շտկելու համար:
Մրցաշարային աղյուսակ
«A» խումբ
| Խ | Հ | Ո | Պ | Գ | Մ | |
| 1. Սերբիա | 4 | 3 | 1 | 0 | 6-1 | 10 |
| 2. Ֆինլանդիա | 4 | 2 | 2 | 0 | 6-2 | 8 |
| 3. Բելգիա | 4 | 2 | 1 | 1 | 4-1 | 7 |
| 4. Լեհաստան | 4 | 2 | 1 | 1 | 5-5 | 7 |
| 5. Պորտուգալիա | 3 | 1 | 1 | 1 | 5-3 | 4 |
| 6. Ղազախստան | 4 | 0 | 2 | 2 | 1-4 | 2 |
| 7. Հայաստան | 3 | 0 | 1 | 2 | 0-4 | 1 |
| 8. Ադրբեջան | 4 | 0 | 1 | 3 | 1-8 | 1 |
ԱՇՈՏ ՀԱՅՐԱՊԵՏՅԱՆ