«ԱԶԳ» ՕՐԱԹԵՐԹ

ՆԱՀԱՆՋԸ ՇԱՐՈՒՆԱԿՎՈՒՄ Է

Հայաստանի ազգային հավաքականը շարունակում է նահանջը ՖԻՖԱ-ի դասակարգման ցուցակում: Նախորդ ամսվա համեմատ մեր ընտրանին վարկանիշը նվազեցրել է 9-ով եւ նահանջել է 7 հորիզոնականով` զբաղեցնելով 119-րդ տեղը: Ընտրական մրցաշարում ՀՀ հավաքականի մրցակիցներից ամենամեծ առաջընթացն ունեցել են լեհերը, որոնք 8 հորիզոնական բարձրացել են եւ գրավում են 27-րդ տեղը: Ֆինները առաջադիմել են 5 (56-րդ տեղ), բելգիացիները` 3 (47-րդ) հորիզոնականով: Պորտուգալիայի (9-րդ տեղ) եւ Սերբիայի (32-րդ) հավաքականները պահպանել են դիրքերը: 11 հորիզոնականով նահանջել է Ադրբեջանի հավաքականը, որը զբաղեցնում է 128-րդ տեղը: Իսկ ղազախները նահանջել են 15 տեղով եւ այժմ 135-րդ հորիզոնականում են:

Նախորդ ամսվա համեմատ դասակարգման ցուցակում բավական կտրուկ փոփոխություններ են տեղի ունեցել: Ամենամեծ առաջընթացն ունեցել է Բարբադոսի հավաքականը` վեր բարձրանալով 52 տեղով, ինչը հնարավորություն է ընձեռել եզրափակել 100 լավագույնների ցուցակը: 44 հորիզոնականով բարձրացել են Սենտ Վինսենտի հավաքականի ֆուտբոլիստները: Սուրինամի եւ Բերմուդայի հավաքականները ցուցակում 41 տեղով են բարձրացել: Իսկ ահա Գվատեմալայի հավաքականը 35 հորիզոնականով նահանջել է: 33 տեղով դիրքերը զիջել են Պերուի ֆուտբոլիստները:

Լավագույն տասնյակում փոփոխությունները չնչին են: Աշխարհի չեմպիոն իտալացիները 3 հորիզոնական բարձրացել են` վարկանիշն ավելացնելով 66-ով եւ այժմ դասակարգման ցուցակը գլխավորող բրազիլացիներին զիջում են միայն 20 կետով: Վերջիններս իրենց վարկանիշը նվազեցրել են 14-ով: Մեկական տեղով նահանջել են Ֆրանսիայի, Արգենտինայի, Անգլիայի, Հոլանդիայի եւ Չեխիայի հավաքականները, իսկ ահա գերմանացիները 2 հորիզոնական բարձրացել են:

Ներկայացնում ենք դասակարգման ցուցակի լավագույն տասնյակի եւ նախկին ԽՍՀՄ հանրապետությունների հավաքականների ցուցանիշները:

ԱՇՈՏ ՀԱՅՐԱՊԵՏՅԱՆ