Վերջին տարիներին տափօղակով հոկեյը մեր հանրապետությունում որոշակի մասսայականություն է վայելում, իսկ Հայաստանի հավաքականն արդեն աշխարհի առաջնությունների մասնակցության փորձ ունի: Հաջորդ մրցաշրջանում էլ հայ հոկեյիստները կմասնակցեն աշխարհի առաջնությանը: Առաջինը մրցասպարեզ դուրս կգան Հայաստանի երիտասարդական հավաքականի հոկեյիստները, որոնք կմասնակցեն հունվարի 8-15-ը Թուրքիայի մայրաքաղաք Անկարայում կայանալիք «C» խմբի աշխարհի երիտասարդական առաջնությանը: Նախնական փուլում մեր հոկեյիստների մրցակիցները կլինեն Թուրքիայի, Նոր Զելանդիայի, Չինաստանի, Բելգիայի եւ Բուլղարիայի հավաքականները: Ընդ որում, մեր հավաքականի առջեւ բավական բարդ խնդիր է դրվելՙ հաղթող ճանաչվել մրցաշարում եւ իրավունք նվաճել հանդես գալու «B» խմբի աշխարհի առաջնությունում:
Աշխարհի «C» խմբի առաջնությանն է նախապատրաստվում նաեւ Հայաստանի ազգային հավաքականը: Մրցաշարը կայանալու է Իռլանդիայում: Մեր հավաքականին հարկ կլինի մրցել Իռլանդիայի, Նոր Զելանդիայի, Հարավաֆրիկյան Հանրապետության, Լյուքսեմբուրգի եւ Մոնղոլիայի թիմերի հետ:
Հայաստանի հոկեյի ֆեդերացիայի նախագահ Կարեն Խաչատրյանը տեղեկացրել է, որ մեր հավաքականն իրավունք ունի պայքարելու 2010 թ. ձմեռային օլիմպիական խաղերի ընտրական մրցաշարին, որին կմասնակցեն 26 հավաքականներ: Մեր հավաքականը պետք է համապատասխան հայտ ներկայացնի, որպեսզի ընդգրկվի 2008 թ. մեկնարկող օլիմպիական ընտրական մրցաշարի մասնակիցների կազմում:
ԱՇՈՏ ՀԱՅՐԱՊԵՏՅԱՆ