ՖԻՖԱ-ն հրապարակել է ազգային հավաքականների դասակարգման հերթական ցուցակը: Նախորդ ցուցակի համեմատ փոփոխություններն աննշան են: Հայաստանի ազգային հավաքականը մեկ հորիզոնականով վեր է բարձրացել` զբաղեցնելով 123-րդ տեղը: Մեր ընտրանին ցուցակում կրկին ավելի բարձր տեղ է զբաղեցնում ադրբեջանցիներից, որոնք 2 հորիզոնականով նահանջել են եւ այժմ 125-րդն են:
Ֆուտբոլի Եվրոպայի առաջնության ընտրական մրցաշարում Հայաստանի հավաքականի մրցակիցներից ամենաբարձր վարկանիշն ունի Պորտուգալիայի ընտրանին (8-րդ տեղ), որը պահպանել է դիրքերը: Լեհերը 2 տեղով նահանջել են` զբաղեցնելով 24-րդ հորիզոնականը: Իսկ ահա մեր մյուս մրցակիցները պահպանել են դիրքերը: Սերբերը 33-րդ տեղում են, ֆիններն ու բելգիացիները ցուցակում հարեւաններ են (52 եւ 53-րդ տեղեր): Ամենացածր վարկանիշն ունեն ղազախները, որոնք պահպանել են տեղը 135-րդ հորիզոնականում:
Նախորդ ամսվա համեմատ ամենամեծ առաջընթացն ունեցել է Դոմենիկյան Հանրապետության հավաքականը, որը 23 հորիզոնականով վեր է բարձրացել եւ այժմ 136-րդն է: 14 տեղով առաջադիմել են Բերմուդայի (107-րդ տեղ) եւ Բանգլադեշի (144-րդ) հավաքականները: Իսկ Գրենադայի հավաքականը 18 հորիզոնականով նահանջել է եւ այժմ 163-րդ տեղում է: Լավագույն տասնյակի ներսում ոչ մի փոփոխություն տեղի չի ունեցել:
Ներկայացնում ենք լավագույն տասնյակի եւ նախկին ԽՍՀՄ հանրապետությունների հավաքականների ցուցանիշները:
| 1. Բրազիլիա | 1588 |
| 2. Իտալիա | 1560 |
| 3. Արգենտինա | 1551 |
| 4. Ֆրանսիա | 1523 |
| 5. Անգլիա | 1359 |
| 6. Գերմանիա | 1350 |
| 7. Հոլանդիա | 1305 |
| 8. Պորտուգալիա | 1258 |
| 9. Նիգերիա | 1244 |
| 10. Չեխիա | 1190 |
| 13. Ուկրաինա | 1054 |
| 22. Ռուսաստան | 858 |
| 45. Ուզբեկստան | 645 |
| 69. Լիտվա | 455 |
| 70. Բելառուս | 447 |
| 86. Մոլդովա | 382 |
| 90. Լատվիա | 364 |
| 94. Վրաստան | 327 |
| 106. Էստոնիա | 278 |
| 123. Հայաստան | 196 |
| 124. Տաջիկստան | 190 |
| 125. Ադրբեջան | 185 |
| 135. Ղազախստան | 158 |
| 139. Ղրղըզստան | 149 |
| 155. Թուրքմենստան | 96 |
ԱՇՈՏ ՀԱՅՐԱՊԵՏՅԱՆ