Պո-Արաքս մշակութային ընկերակցության մամլո հաղորդագրությամբ, Վենետիկի համալսարանի հայոց լեզվի եւ մշակույթի ամառային խտացյալ դասընթացը տեղի կունենա օգոստոսի 1-20-ը: Մասնակցության համար պահանջվող նվազագույն տարիքն է 18-ը: Դիմորդների խնդրանքով այս տարի առաջին անգամ նախատեսված են հայկական պարերի ու հայկական խոհանոցի անվճար դասընթացներ:
Խտացյալ դասընթացի ընդհանուր արժեքը 670 եվրո է, որից 450-ը պետք է վճարել մինչեւ մայիսի 31-ը: Մնացած գումարը անհրաժեշտ է վճարել դասընթացի առաջին օրը: Դասընթացի արժեքի փոփոխություն ընթացքում չի լինում, իսկ վճարված գումարը որեւէ պատճառով չի վերադարձվում: Վճարման անձնական ու փոստային կտրոններն ընդունելի չեն, վճարված ամեն մի կտրոն պիտի ունենա բանկի երաշխիքը: Չնայած բանկային բոլոր ծախսերը հոգում է դիմորդը, սակայն խնդրում են բանկային փոխանցումներ չկատարել` միջնորդակտրոնի բարձր գնի պատճառով: Փոստային փոխանցումը պետք է կատարվի միայն միջազգային փոխագիրների միջոցով (mandat-post international/ international money-order):
Դասընթացի մասնակիցները հնարավորություն կունենան բնակվելու քաղաքի պատմական կենտրոնում գտնվող ուսանողատանը` հուլիսի 30-ից օգոստոսի 22-ը: Առանձին սենյակի վարձը 800 եվրո է, երկհոգանոցը` 600: Ճաշը կամ ընթրիքը այդ գումարի մեջ չի մտնում, համալսարանի ճաշարանում դրանք արժեն 7 եվրո:
Հավելյալ տեղեկությունների համար զանգահարել +39.041.2414448, կամ էլեկտրոնային նամակ ուղարկել daniela@padus-araxes.com հասցեով:
Ռ. Պ.