«ԱԶԳ» ՕՐԱԹԵՐԹ

ԻՏԱԼԱՑԻՆԵՐԸ «ԳԱՀԸՆԿԵՑ» ԱՐԵՑԻՆ ԲՐԱԶԻԼԱՑԻՆԵՐԻՆ

ՖԻՖԱ-ն հրապարակել է ազգային հավաքականների դասակարգման հերթական վարկանիշային ցուցակը: Նախորդ ամիսների համեմատ դասակարգման փետրվարյան ցուցակը գլխավորում է աշխարհի չեմպիոն Իտալիայի ընտրանին: Թեեւ իտալացիները տեղի ունեցած ողբերգական միջադեպի հետեւանքով չմասնակցեցին նախատեսված ընկերական հանդիպմանը, սակայն հաջողվեց շրջանցել դասակարգման ցուցակի վերջին տարիների անփոփոխ առաջատար բրազիլացիներին: Վերջիններս պարտվելով պորտուգալացիներից, իրենց վարկանիշը նվազեցրին 48-ով, ինչն էլ հնարավորություն ընձեռեց իտալացիներին շրջանցել աշխարհի հնգակի չեմպիոններին: Նշենք, որ մինչ այդ, Բրազիլիայի հավաքականը 55 ամիս դասակարգման ցուցակի առաջատարն էր: Իսկ Իտալիայի հավաքականը դասակարգման ցուցակը վերջին անգամ գլխավորել էր 1993 թ. նոյեմբերին:

Չորս հորիզոնականով առաջադիմել է Հայաստանի հավաքականը, որը ներկայումս 119-րդ տեղում է: Մեր ընտրանուն հաջողվել է 13 կետով ավելացնել վարկանիշը: Ընտրական մրցաշարում Հայաստանի հավաքականի առաջիկա մրցակից Լեհաստանի ֆուտբոլիստները 2 տեղով վեր են բարձրացել եւ զբաղեցնում են 23-րդ հորիզոնականը: Իսկ մեր մրցակիցներից ամենաբարձր վարկանիշն ունի Պորտուգալիայի ընտրանին, որը պահպանել է դիրքը 8-րդ հորիզոնականում: 4-ական տեղով վեր են բարձրացել սերբերը (29րդ տեղ) եւ ֆինները (48-րդ), բելգիացիներն էլ մեկ հորիզոնականով են առաջ շարժվել (52-րդ տեղ): Իսկ ահա Ադրբեջանի եւ Ղազախստանի հավաքականները 3 տեղով նահանջել են:

Ամենամեծ առաջընթացն ունեցել է Սալվադորի հավաքականը, որը վարկանիշն ավելացրել է 100 կետով եւ վեր բարձրացել 31 տեղով: Իսկ ահա Գվինեայի հավաքականը 40 տեղով նահանջել էՙ իր վարկանիշը նվազեցնելով 386-ով:

Ներկայացնում ենք լավագույն տասնյակի եւ նախկին ԽՍՀՄ հանրապետությունների հավաքականների ցուցանիշները:

ԱՇՈՏ ՀԱՅՐԱՊԵՏՅԱՆ