Ֆուտբոլի Հայաստանի բարձրագույն խմբի առաջնությունում բավական հետաքրքրական մրցապայքար է ծավալվել: 2-րդ տուրում եւս գրանցվեց խոշոր հաշիվ: Այս անգամ արդյունավետ խաղով աչքի ընկավ «Արարատը»ՙ 5 անպատասխան գնդակ ուղարկելով «Կիլիկիայի» դարպասը: Արարատցիների կազմում իրենց վարպետ խաղով հատկապես աչքի ընկան բրազիլացիներ Մարկոսն ու Ռենատոն: Նրանք լավ էին համագործակցում խաղընկերների հետ եւ իրենք էլ վերջակետ դնում թիմի գրոհներին: Արդյունավետությամբ հատկապես առանձնացավ Մարկոսը, որը 3 գոլ խփեց: Մեկական գնդակ էլ իրենց օգտին գրանցեցին Ռենատոն ու Մովսիսյանը: Այսպիսով, «Արարատը» կրկնեց ընթացիկ առաջնության նախորդ տուրում «Փյունիկի» արդյունավետության ռեկորդը, որը 5-0 հաշվով հաղթել էր «Ուլիսին»:
Որքան էլ որ անսպասելի է, առաջնության մեկնարկից առաջատարների շարքում է հայտնվել «Գանձասարը», որին այս տարի մարզում է հանրապետության փորձառու ֆուտբոլային մասնագետներից մեկըՙ Սուրեն Բարսեղյանը: Վերջինիս գլխավորությամբ թիմը 2-րդ հաղթանակը տոնեցՙ այս անգամ 2-0 հաշվով պարտության մատնելով «Ուլիսին»: Գոլերի հեղինակներ դարձան Կարեն Խաչատրյանն ու Վահե Դավթյանը: Ընդ որում 1-0 հաշվի ժամանակ «Ուլիսի» եգիպտացի լեգեոնական Ռաջաբ Իբրահիմը չիրացրեց 11մ հարվածը:
Տուրի կենտրոնական հանդիպումը «Բանանցի» եւ «Փյունիկի» մրցավեճն էր: Առաջին խաղակեսում դարպասները մնացին անառիկ: Ընդմիջումից հետո փոխարինման մտած Ռաֆայել Նազարյանը բացեց հաշիվը: Սակայն քիչ անց «Բանանցի» պաշտպան Աշոտ Գրիգորյանը վերականգնեց հավասարակշռությունը: Խաղավերջում «Փյունիկի» մարզիչները եւս մեկ հաջող փոխարինում կատարեցին եւ խաղադաշտ մտած Գեւորգ Ղազարյանը խփեց հաղթական գնդակը (2-1):
«Շիրակի» հետ մրցավեճում «Միկայի» մարզիչները թիմի մեկնարկային կազմում ընդգրկել էին յոթ լեգեոնականների: Նրանցից բրազիլացի Կլեբեր Լուիս Ռոդրիգեսը դարձավ հանդիպման հերոսըՙ 3 անգամ գրավելով մրցակցի դարպասը: Շիրակցիները դրանց պատասխանեցին Արտյոմ Բեռնեցյանի գոլով:
Մրցաշարային աղյուսակ
| Խ | Հ | Ո | Պ | Գ | Մ | ||
| 1. | Փյունիկ | 2 | 2 | 0 | 0 | 7-1 | 6 |
| 2. | Միկա | 2 | 2 | 0 | 0 | 5-2 | 6 |
| 3. | Գանձասար | 2 | 2 | 0 | 0 | 3-0 | 6 |
| 4. | Արարատ | 2 | 1 | 0 | 1 | 5-1 | 3 |
| 5. | Բանանց | 2 | 0 | 1 | 1 | 1-2 | 1 |
| 6. | Շիրակ | 2 | 0 | 1 | 1 | 1-3 | 1 |
| 7. | Կիլիկիա | 2 | 0 | 0 | 2 | 1-7 | 0 |
| 8. | Ուլիս | 2 | 0 | 0 | 2 | 0-7 | 0 |
Ռմբարկուները
| Մարկոս | «Արարատ» | 3 |
| Կլեբեր | «Միկա» | 3 |
ԱՇՈՏ ՀԱՅՐԱՊԵՏՅԱՆ