Ֆուտբոլի պատմության եւ վիճակագրության միջազգային ֆեդերացիան հրապարակել է աշխարհի 350 լավագույն ակումբների ցանկը: Այն ընդգրկում է թիմերի ցուցանիշները 2006 թ. մայիսի 1-ից մինչեւ 2007 թ. ապրիլի 30-ը: Արդեն 8-րդ ամիսն է, ինչ լավագույն ակումբների ցանկը գլխավորում է ՈւԵՖԱ-ի գավաթակիր իսպանական «Սեւիլիան»:
Նախորդ ամսվա համեմատ զգալի առաջընթաց են ապրել Հայաստանի պատվիրակները` «Փյունիկն» ու «Միկան»: Բացի այդ, 350 ակումբների ցանկում հայտնվել է մեր հանրապետության 3-րդ թիմը` «Բանանցը», որը մինչ այդ 431-րդ տեղում էր: Իսկ այժմ հանրապետության արծաթե մրցանակակիրը 60 գործակցով 335-րդ հորիզոնականում է: Երկրի չեմպիոն «Փյունիկը» 254-րդ տեղից բարձրացել է 190-րդ հորիզոնական 81 գործակցով: Իսկ «Միկան» 73 գործակցով 334-րդ հորիզոնականից տեղափոխվել է 239-րդ տեղը:
Ինչպես եւ նախորդ ցուցակում, այս անգամ էլ ԱՊՀ եւ մերձբալթյան երկրների թիմերից լավագույնը Դոնեցկի «Շախտյորն» է, որը 166 գործակցով 36-րդ տեղում է: 100 լավագույն թիմերի ցանկում տեղ են զբաղեցրել նաեւ Մոսկվայի ԲԿՄԱ-ն (45-րդ տեղ), «Սպարտակը» (49-րդ), Կիեւի «Դինամոն» (57-րդ): Հետաքրքրական է, որ «Փյունիկն» առաջ է անցել նախկին ԽՍՀՄ հանրապետությունների այնպիսի թիմերից, ինչպիսիք են Մոսկվայի «Լոկոմոտիվը», Տաշքենդի «Պախտակորը», Տալլինի ՏՎՄԿ-ն, Պանեւեժիսի «Էկրանասը», «Մոսկվան», Թբիլիսիի «Ամերին», Դնեպրոպետրովսկի «Դնեպրը», Սանկտ Պետերբուրգի «Զենիթը», Կազանի «Ռուբինը», Զապորոժիեի «Մետալուրգն» ու Խարկովի «Մետալիստը»:
Զգալի փոփոխություններ են կատարվել լավագույն տասնյակում: «Մանչեսթր յունայթեդը» 7-րդ հորիզոնականից տեղափոխվել է 2-րդ տեղ: 3-րդ տեղում «Չելսին» է, որը նախորդ ցուցակում 11-րդն էր: 3 հորիզոնական վեր է բարձրացել «Ռոման»` զբաղեցնելով 8-րդ տեղը: Լավագույն տասնյակում տեղ է զբաղեցրել բրազիլական «Սան Պաուլոն», որը մինչ այդ 13-րդն էր: Իսկ ահա Միլանի «Ինտերը» 2-րդ տեղից նահանջել է 6-րդ հորիզոնական, իսկ «Նյուքասլը» նահանջել է 3 հորիզոնականով` տեղ զբաղեցնելով 9-րդ տեղում:
Ներկայացնում ենք աշխարհի 20 լավագույն ակումբների ցուցանիշները (փակագծում նշված է նախորդ ցուցակում թիմի գրաված դիրքը):
| 1 (1). «Սեւիլիա» | Իսպանիա | 277 |
| 2 (7). «Մանչեսթր յունայթեդ» | Անգլիա | 270 |
| 3 (11). «Չելսի» | Անգլիա | 267 |
| 4 (4). «Կոլո Կոլո» | Չիլի | 59,5 |
| 5 (5). «Միլան» | Իտալիա | 247 |
| 6 (2). «Ինտեր» | Իտալիա | 241 |
| 7 (8). «Լիվերպուլ» | Անգլիա | 233 |
| 8 (11). «Ռոմա» | Իտալիա | 222 |
| 9 (6). «Նյուքասլ» | Անգլիա | 221 |
| 10 (13). «Սան Պաուլո» | Բրազիլիա | 218 |
| 11 (14). «Սանթոս» | Բրազիլիա | 218 |
| 12 (16). «Էսպանյոլ» | Իսպանիա | 215 |
| 13 (3). «Բարսելոն» | Իսպանիա | 215 |
| 14 (9). «Ինտերնասիոնալ» | Բրազիլիա | 211 |
| 15 (31). «Օսասունա» | Իսպանիա | 209 |
| 16 (18). «Այաքս» | Հոլանդիա | 203 |
| 17 (26). «Վերդեր» | Գերմանիա | 203 |
| 18 (19). «Տոտենհեմ» | Անգլիա | 202 |
| 19 (25). «Ալկմաար» | Հոլանդիա | 00,5 |
| 20 (15). «Լիբերտադ» | Պարագվայ | 99,5 |
ԱՇՈՏ ՀԱՅՐԱՊԵՏՅԱՆ