«ԱԶԳ» ՕՐԱԹԵՐԹ

ՆԱՀԱՆՋԸ ՇԱՐՈՒՆԱԿՎՈՒՄ Է

Ֆուտբոլի Հայաստանի ազգային հավաքականը եւս մեկ հորիզոնականով նահանջել է ՖԻՖԱ-ի դասակարգման հերթական ցուցակումՙ իր վարկանիշը նվազեցնելով 4-ով: Այժմ մեր ընտրանին 180 վարկանիշով զբաղեցնում է 128-րդ հորիզոնականը:

Ընտրական «A» խմբում Հայաստանի հավաքականի մրցակիցներից ամենաբարձր վարկանիշն ունի Պորտուգալիայի ընտրանին (1300), որը 7-րդ տեղում է: Պորտուգալացիները պահպանել են դիրքերըՙ վարկանիշը բարձրացնելով 8 կետով: Մեր հավաքականի առաջիկա մրցակիցներ լեհերը, որոնց հայ ֆուտբոլիստները հյուրընկալելու են հունիսի 6-ին, 3 տեղով առաջադիմել են, վարկանիշը բարձրացրել են 32-ով եւ այժմ 18-րդն են: Մեկ տեղով վեր են բարձրացել սերբերը (31-րդ հորիզոնական) եւ ղազախները (115-րդ): Ֆիններն (45-րդ տեղ) ու ադրբեջանցիները (103-րդ) պահպանել են դիրքերը, իսկ ահա բելգիացիները 3 հորիզոնականով նահանջել են եւ այժմ 62-րդ տեղում են:

Դասակարգման ցուցակում ամենամեծ առաջընթացը գրանցվել է Կոնգոյի Դեմոկրատական Հանրապետության հավաքականի մոտ, որը 23 հորիզոնականով բարձրացել է եւ այժմ 61-րդ տեղում է: Իսկ ահա Մոնղոլիայի ընտրանին նահանջել է 11 տեղով:

Անփոփոխ է մնացել լավագույն տասնյակի կազմը, իսկ դրա ներսում ընդամենը մեկ փոփոխություն է կատարվել: Բրազիլացիները տեղափոխվել են 2-րդ հորիզոնականՙ շրջանցելով արգենտինացիներին, վերջիններիս զիջելով իրենց տեղը:

Ներկայացնում ենք լավագույն տասնյակի եւ նախկին ԽՍՀՄ հանրապետությունների հավաքականների ցուցանիշները:

ԱՇՈՏ ՀԱՅՐԱՊԵՏՅԱՆ