Իսպանիայի արտգործնախարար Միգել Անխել Մորատինոսը հայտարարել է, որ իր երկիրը պատրաստ է խաղադաշտ տրամադրել Հայաստանի եւ Ադրբեջանի հավաքականների միջեւ կայանալիք ընտրական երկու մրցախաղերի անցկացման համար, որոնք խաղացանկով պետք է կայանան սեպտեմբերին: Ըստ որոշ աղբյուրների, Հայաստանի եւ Ադրբեջանի իշխանությունները դրականորեն են արձագանքել պաշտոնական Մադրիդի այդ առաջարկին: Այս հարցում վերջնական խոսքը պատկանում է ՈւԵՖԱ-ի նախագահ Միշել Պլատինիին: Վերջինիս հետ Մորատինոսը հեռախոսազրույց է ունեցել: Պլատինին եւս ողջունել է իսպանական կողմի նախաձեռնությունը` առաջարկելով երկու երկրների ֆուտբոլի ֆեդերացիաների ղեկավարներին քննարկել այն:
Նշենք, որ հայկական կողմի տեսակետը վաղուց է հայտնի: Հայաստանի իշխանությունները երաշխավորում են ադրբեջանական կողմի անվտանգությունը եւ պատրաստ են հյուրընկալել Ադրբեջանի հավաքականին Երեւանում: Միաժամանակ մեր հավաքականը պատրաստ է խաղալ Բաքվում, եթե ադրբեջանական կողմն էլ անվտանգության ապահովման երաշխիքներ ապահովի: Ինչ խոսք, Հայաստան-Ադրբեջան հանդիպումների վայրի վերջնական ընտրությունը կկատարի ՈւԵՖԱ-ն:
ԱՇՈՏ ՀԱՅՐԱՊԵՏՅԱՆ