«ԱԶԳ» ՕՐԱԹԵՐԹ

ԵՐԿՈՒ ՀԱՂԹԱՆԱԿՆԵՐՆ ԱՊԱՀՈՎԵՑԻՆ ՀԱՅԱՍՏԱՆԻ ՀԱՎԱՔԱԿԱՆԻ ՄԵԾ ԱՌԱՋԸՆԹԱՑԸ

Եվրո-2008-ի ընտրական մրցաշարում ղազախների եւ լեհերի նկատմամբ տոնած հաղթանակների շնորհիվ Հայաստանի ազգային հավաքականը հունիսի 13-ին հրապարակված ՖԻՖԱ-ի դասակարգման հերթական ցուցակում աննախադեպ, պարզապես ռեկորդային թռիչք է կատարել: Մեր ընտրանին միանգամից 48 հորիզոնական վեր է բարձրացելՙ միանգամից վարկանիշը բարձրացնելով 219-ով, եւ հանգրվանել է 80-րդ տեղում: Վաղուց ի վեր Հայաստանի հավաքականը դասակարգման ցուցակում նման բարձր դիրք չէր գրավել: Նախկին ԽՍՀՄ հանրապետություններից այժմ Հայաստանը զիջում է միայն Ուկրաինային (13-րդ տեղ), Ռուսաստանին (24), Ուզբեկստանին (58), Բելառուսին (72) եւ Լիտվային (79):

Նշենք, որ Հայաստանի հավաքականի առաջընթացն ամենամեծն է դասակարգման ցուցակի 207 հավաքականների մեջ: Հետաքրքրական է, որ ՀՀ հավաքականին պարտված լեհերը, որոնք մինչ այդ հյուրընկալվելիս հաղթել էին ադրբեջանցիներին, պահպանել են իրենց դիրքը 18-րդ հորիզոնականումՙ վարկանիշը բարձրացնելով 31-ով: Իսկ ահա ղազախները չորս տեղով նահանջել են: Հայաստանի հավաքականից հետո ամենամեծ առաջընթացը գրանցվել է Կանադայի ընտրանու մոտ, որը բարձրացել է 38 տեղով, վարկանիշն ավելացնելով 197-ով: Իսկ ահա Նոր Զելանդիայի հավաքականի մոտ ամենամեծ հետընթացն է գրանցվել: Նորզելանդացիները 27 տեղով նահանջել են, վարկանիշն էլ նվազեցրել են 87-ով:

Ընտրական «A» խմբում Հայաստանի հավաքականի մրցակիցներից նախկինի պես ամենաբարձր վարկանիշն ունի Պորտուգալիայի ընտրանին, որը մեկ տեղով առաջադիմել էՙ զբաղեցնելով 6-րդ հորիզոնականը: Սերբերը բարձրացել են 9 տեղով եւ այժմ 22-րդն են: Ֆիններն էլ առաջադիմել են 3 հորիզոնականով (42-րդ տեղ): Բելգիայի ընտրանին 9 հորիզոնականով նահանջել է եւ այժմ 71-րդն է: Ադրբեջանի հավաքականը 6 տեղով է նահանջելՙ վարկանիշը նվազեցնելով 20-ով:

Ներկայացնում ենք դասակարգման ցուցակի լավագույն տասնյակի եւ նախկին ԽՍՀՄ հանրապետությունների հավաքականների ցուցանիշները:

ԱՇՈՏ ՀԱՅՐԱՊԵՏՅԱՆ