Ամերիկյան հեռարձակումների տնօրենների խորհրդին չի հաջողվել համաձայնություն ձեռք բերել Հայաստանի հանրային ռադիոյի հետ` «Ազատություն» ռադիոկայանի հաղորդումների հետագա վերահեռարձակման շուրջ: Հուլիսի 24-ի ուշ երեկոյան «Ազատ Եվրոպա/Ազատություն» ռադիոկայանը եւ այն վերահսկող գործակալությունը` Ամերիկյան հեռարձակումների տնօրենների խորհուրդը Վաշինգտոնում տարածել են հաղորդագրություն` մտահոգություն արտահայտելով, որ Հայաստանի Հանրային ռադիոն հրաժարվել է երկարաձգել «Ազատություն» ռադիոկայանի հայկական ծառայության ծրագրերի հեռարձակումը շարունակելու պայմանագիրը:
Ըստ «Ազատության», հաղորդագրության մեջ նշվում է, որ ուսումնասիրությունների տվյալները վկայում են, որ Հայաստանի մեծահասակ բնակչության 15 տոկոսը ամեն շաբաթ լսում է «Ազատություն» ռադիոկայանի ծրագրերը: «Մեր պատվիրակությանը խնդրեցին մեկնել Երեւան` շտկելու որոշ աննշան տեխնիկական հարցեր եւ կնքելու այս հաջող գործընկերությունը երկարաձգելու պայմանագիր», ասել է Ամերիկյան հեռարձակումների տնօրենների խորհրդի նախագահ Ջեյմս Գլասսմանը: «Բոլոր այդ հարցերը լուծվեցին: Մեր պատվիրակությանն ասացին, որ վերջնաժամկետներ չկան եւ որեւէ սպառնալիք չկա, որ «Ազատություն» ռադիոկայանի ծրագրերը դուրս կմնան Հանրային ռադիոյի եթերից: Պայմանագիրը, այդուհանդերձ, մնաց չստորագրված, իսկ վճարումները կատարելու մեր առաջարկությունը մերժվեց: Ակնհայտ է, որ այն, ինչը խոչընդոտում է պայմանագրի ստորագրմանը, կապ չունի իրավական, պայմանագրային կամ տեխնիկական հարցերի հետ»:
Ուշ երեկոյան «Հայլուրը» հրապարակեց Հանրային հեռուստառադիոխորհրդի պատասխան հայտարարությունը, որի մասինՙ մեր վաղվա համարում:
ԱՂԱՎՆԻ ՀԱՐՈՒԹՅՈՒՆՅԱՆ