Ջիվան Գասպարյանը Թուրքիայում
ներկայացրել է Կոմիտաս, Սայաթ-Նովա, հայկական հին երգեր
Ջիվան Գասպարյանի Թուրքիայում տված համերգներն ու դրանց առնչությամբ արձագանքները երեկ քննարկման թեմա էին «Հայացք» ակումբում` աշխարհահռչակ դուդուկահարի մասնակցությամբ: Խաղաղությանը նվիրված համերգներն Անկարայում եւ Ստամբուլում, Ջիվան Գասպարյանի ներկայացմամբ, անցել են մեծագույն ոգեւորությամբ ու ընդունվել շատ ջերմ: Իսկ համաձայնել է Գասպարյանը համերգի մասնակցել թուրք հայտնի երգիչ Բինգյոլի հետ միայն 6 ամիս համոզելու գործընթացից, նաեւ ՀՀ արտգործնախարարությունում խորհրդակցելուց հետո:
Թուրքիայի մշակույթի նախարարության հրավերն ընդունելովՙ Ջիվան Գասպարյանը համերգի ընթացքում կատարում է նվիրել նաեւ Հրանտ Դինքի հիշատակին, հարցազրույցի է մասնակցել թուրքական հեռուստատեսությամբ: Որոշ մանրամասներ հաղորդելով հիմնականում երաժշտական ուղղվածությամբ հարցազրույցից` Գասպարյանը տեղեկացրեց, որ մի շարք հարցեր վերաբերել են քաղաքականությանը, նաեւ դուդուկի` ծիրանափողի ծագմանը: Սակայն Ջիվան Գասպարյանը նախընտրել է ներկայանալ այնպես, թե ինքը միայն երաժիշտ է եւ չի զբաղվում քաղաքականությամբ:
«Ես չեմ խորանում քաղաքականության մեջ, քանի որ կարող է ինձ թվալ, թե ճիշտ եմ ասում, բայց սխալ խոսեմ», թուրքական հեռուստատեսության լրագրողի հարցերին ցեղասպանության եւ Թուրքիայում հայերին առնչվող հարցերի վերաբերյալ այսպես է պատասխանել Գասպարյանը: Իսկ թե ինչու թուրք արվեստագետները Հայաստան չեն գալիս, Գասպարյանի կարծիքով, նրանց խնդիրն է, քանի որ Հայաստանի դռները բաց են:
«Ազգը» հետաքրքրվեց, թե հատկապես ինչ է կատարվել Անկարայի եւ Ստամբուլի համերգներում եւ ինչպես է հանդիսատեսին ներկայացվել ինչպես դուդուկը, այնպես էլ Ջիվան Գասպարյան դուդուկահարը: Գասպարյանի խոսքերով, հենց համերգային ծրագրի մյուս մասնակից երգիչ Բինգյոլն է ներկայացրել դուդուկահարին, ընդգծելով, որ անգամ չի հավատացել Ջիվան Գասպարյանի հետ համատեղ ներկայանալու հավանականությանը: Իսկ կատարել է Գասպարյանը Կոմիտասի, Սայաթ-Նովայի, Եկմալյանի ստեղծագործություններից, սեփական իմպրովիզները, նաեւ հայկական հին երգեր: Իհարկե, Թուրքիայի հանդիսատեսին են ներկայացվել նաեւ հայտնի ֆիլմերում Ջիվան Գասպարյանի կատարմամբ հնչած ստեղծագործությունները:
ԱՂԱՎՆԻ ՀԱՐՈՒԹՅՈՒՆՅԱՆ