Հայոց գինի էր «ծորում» Մոսկվայի Համառուսաստանյան ցուցահանդեսային կենտրոնի (նախկին ԹԺծղ) «Արմենիա» տաղավարում: Ռուսաստանում ՀՀ առեւտրական ներկայացուցչությունը գովազդային «Գինու տոն էր կազմակերպել մեր խմիչքները հանրաճանաչ դարձնելու նպատակով:
Ռուսաստանը հեղեղած վրացական ու մոլդովական գինիների մուտքն արգելելուց հետո տեղի շուկայի վաճառասեղաններին բավականին արագ դրանց տեղը գրավեցին եվրոպական (Ֆրանսիա, Իտալիա, Պորտուգալիա, Բուլղարիա), հարավամերիկյան ու նույնիսկ հարավաֆրիկյան գունավոր ու անգույն ալկոհոլաշշերը: Իսկ հայոց գինիները, որոնք իրենց յուրահատկություններն ունեն համով թե որակով, դժվարությամբ են ճանապարհ հարթում այս անծայրածիր ու խմիչքասեր վաճառատարածքում: Պատճառը մեկն էՙ ճանաչված չեն, ի տարբերություն, ասենք, մեր կոնյակի: Իսկ ճանաչվելու համար հսկայական միջոցներ են պահանջվում, ինչը, ցավոք, դժվար լուծվող խնդիր է հայաստանյան ֆիրմաների համար: Ահա եւ Ռուսաստանում ՀՀ առեւտրական ներկայացուցչությունը փորձում է իր հնարավորության սահմաններում ժամանակ առ ժամանակ լրացնել այդ բացը:
Միջոցառմանը մասնակցում էին գինի արտադրող տասից ավելի հայաստանյան ու արցախյան ընկերություններ: Շահեկան էր, որ հրավերին արձագանքել էին մոսկովյան խոշորագույն առեւտրական ու սպասարկման ֆիրմաների, մայրաքաղաքի կառավարության սպառողական մարմինների ներկայացուցիչները: Եվ եթե տաղավարի բազմահազար այցելուները սոսկ վայելում էին բուրումնավետ հայոց խմիչքները, ապա մասնագետներն ու շահագրգիռ անձինք դրանք «բանիմաց» տեսքով համտեսում էին:
- Եթե այստեղ պահանջարկ լինի, Հայաստանում գինիների արտադրությունը կարելի է էապես մեծացնել, - ասաց ՌԴ-ում ՀՀ առեւտրական ներկայացուցիչ Կարեն Ասոյանը: - Սակայն մրցակցային պայքարն աննախադեպ անողոք է: Առայժմ այստեղ առավել ակտիվ են տեղի հայ կոմերսանտները, եւ մեր խնդիրն է այդ գործուն ուժը դարձնել առավելագույնս «ինտերնացիոնալ»:
ՌՈՒԲԵՆ ՀԱՅՐԱՊԵՏՅԱՆ, Մոսկվա