Ֆուտբոլի Հայաստանի բարձրագույն խմբի առաջնությունը մոտենում է վերջնագծին: Առաջնության ավարտին մնացել է ընդամենը չորս տուր, սակայն մեդալների համար մղվող պայքարում առայժմ պարզություն չկա: Ավելին, 23-րդ տուրն էլ ավելի խճճեց իրավիճակը աղյուսակի վերին հորիզոնականներում: Առաջատարն «Արարատն» է (48 միավոր), որին մեկ միավորով զիջում է «Փյունիկը»: Ճիշտ է, վերջինս մեկ խաղ պակաս է անցկացրել: 3-րդ հորիզոնականը 46 միավորով զբաղեցնում է «Բանանցը», իսկ «Միկան», որ մեկ խաղ պակաս է անցկացրել, ունի 40 միավոր:
Այս իրավիճակում որոշ պարզություն կարող էին մտցնել առաջիկա տուրի «Փյունիկ»-«Արարատ» եւ «Բանանց»-«Միկա» հանդիպումները: Սակայն հաշվի առնելով «Փյունիկ» եւ «Բանանց» թիմերի ֆուտբոլիստների զբաղվածությունը Հայաստանի ազգային, երիտասարդական եւ մինչեւ 19 տարեկանների պատանեկան հավաքականներում, ֆուտբոլի հանրապետական ֆեդերացիան որոշել է նշված խաղերը հետաձգել: Դրանք կկայանան նոյեմբերի 7-ին, ժամը 2-ին:
ԱՇՈՏ ՀԱՅՐԱՊԵՏՅԱՆ